The Good Liar : هل الحب خدعة كبيرة؟!

فيلم The Good Liar يعتبر من الأفلام اللي بتحاول تلعب على أكثر من تيمة في نفس الوقت. وعلى الرغم من المخاطر اللي بتواجه الأفلام اللي بتعمل كده لأنها ممكن تفشل في النهاية أنها تقدم أحداث مترابطة. The Good Liar قدر يخرج من كل ده بأقل خسائر ممكنة.

The Good Liar بيحكي عن النصاب المحترف روي كورتناي واللي قام بدوره إيان ماكلين واللي بيحاول يوقع أرملة ثرية في حباله علشان ينصب عليها (قامت بالدور هيلين ميرين). لكن كل خططه بتتغير مع تتابع الأحداث.

لو سألتنا عن أكتر حاجتين مميزتين في الفيلم هانقول لك السيناريو ثم الأداء التمثيلي. والحقيقة ان العنصرين دول لعبوا (دويتو) مهم ساعد على نجاح الفيلم. لأن السيناريو كان سريع وقدر يقدم مشاهد جيدة وقصة بدون حشو أو مط. وفي نفس الوقت الأداء التمثيلي كان أكثر من رائع.

على الرغم من تقدم هيلين ميرين و إيان ماكلين في السن إلا أن كل منهم قدر يقوم بالدور بشكل أكثر من رائع. مع التركيز على ملامح الوجه ونظرات العيون لتقديم أفضل أداء تمثيلي ممكن منهم. وهنا ييجي دور المخرج بيل كوندون علشان يلعب على القدرات التمثيلية دي بشكل جيد. وهو مخرج أفلام زي Mr. Holmes و جزئين من أجزاء سلسلة أفلام The Twilight

لكن العيب الأساسي في الفيلم كان أن القصة قابلة للتوقع الى حد ما. خاصة من المشاهدين اللي لهم خبرة طويلة بالسينما والأفلام. لكن ممكن أنه تم التعويض عن ده بعناصر قوة الفيلم اللي اتكلمنا عليها. بالتالي حسينا كأننا مسافرين طريق طويل احنا عارفينه لكن بمواصلة مريحة تخلينا لا نشعر بالملل.

The Good Liar فيلم جميل يصلح لمشاهدة في نهاية خروجه طويلة. ولعل أهم سؤال بيطرحه الفيلم: هل شعور الحب هو أحلى شعور بالخداع بنحس بيه؟ شاركونا اجاباتكم.