Ford v Ferrari : أحلى فيلم سباقات ده ولا ايه؟!
معظم الأفلام بتحاول تقدم أكثر من قيمة وهدف وتيمة من خلال أحداثها. لكن معظم الأفلام اللي بتحاول تعمل كده بتفشل فشل ذريع. Ford v Ferrari من الأفلام اللي نجحت مش بس في أنها تقدم فيلم سباق سيارات كله أكشن. لكن كمان فيلم إنساني رفيع المستوى.
Ford v Ferrari بيحكي عن المنافسة اللي خاضتها شركة فورد ضد شركة فيراري اللي كانت متربعة على عرش عالم سيارات السباق. الصراع بين الشركتين بنشوفه على أكتر من مستوى. على المستوى الإنساني وعلى المستوى العملي وحتى على مستوى السباق بين السيارات في جو كله حماس وقصة مقتبسة عن أحداث حقيقية دارت سنة ١٩٦٦ ضمن أحداث سباق لومان الشهير.
المخرج جيمس مانجولد قدر يصحبنا في رحلة غير تقليدية في عالم سباق السيارات. السبب اللي بيخلينا نقول أنها غير تقليدية هي أنها مش مجرد رحلة في المنافسة بين شركتين. لكن كمان رحلة نفسية في عقل وقلب أبطال الفيلم كريستان بيل ومات ديمون.
مجرد ما بنقول أسم أبطال الفيلم بتنتابنا القشعريرة! إحنا هنا بنتكلم عن اتنين من أباطرة هوليود. وقدروا يخلقوا حالة من الكيمياء بينهم تخلي المشاهدين منتظرين كل مشهد لأي واحد فيهم علشان نتفرج على مباراة مميزة من الأداء الراقي.
كل ده كان مُتوج بتصميم مشاهد أكثر من رائع. وهندسة صوت مهتمة بكل تفصيله من تفاصيل الفيلم. أما عن تصميم مشاهد السباقات نفسنا فكانت أكثر من رائعة وفيها مجهود مميز واهتمام غير عادي بالتفاصيل وزوايا الكاميرا وطرق إخراج المشاهد.
لو بتحب أفلام سباقات السيارات فا Ford v Ferrari هايعجبك جدا.. أما لو كنت بتحب الأفلام المقتبسة عن قصص حقيقية فا فيلم Ford v Ferrari هايعجبك جدا.. أما بقى لو بتحب الأفلام اللي فيها صراع نفسي وتقلبات مختلفة بين شخصيات الابطال.. Ford v Ferrari هايعجبك جدا!
