معلومات أول مرة تعرفها عن Oppenheimer رائعة كريستوفر نولان المنتظرة
مافيش شك أن فيلم Oppenheimer يعتبر واحد من أكتر الأفلام المُنتظرة في ٢٠٢٣. بسبب الدعاية المكثفة اللي حظى بيها الفيلم. والكلام عنه كواحد من أفضل أفلام العالم من حيث التقنية وجودة التصوير. والحقيقة يعني أن محبي هوليود مش محتاجين الدعاية والكلام عن جودة التصوير وما الى ذلك. لأن إسم (كريستوفر نولان) كمخرج للفيلم كفيل بعمل الدعاية اللازمة
نولان هو مخرج مجموعة من أحلى وأعظم الأفلام في التاريخ. بنتكلم عن أعمال زي The Prestige و Inception و Interstellar و Dunkirk ده غير إخراجه لسلسلة أفلام تناولت شخصية بات مان بأفضل ما يكون.
تعالوا نتعرف على مجموعة معلومات مش كلكم تعرفوها عن Oppenheimer الفيلم المرتقب لكريستوفر نولان. اللي المفترض يبدأ عرضه في ٢١ يوليو القادم. واللي بيعود بينا لفترة الحرب العالمية الثانية، وبالأخص في كواليس صناعة القنبلة النووية اللي غيرت عالمنا المعاصر، حتى لحظة كتابة السطور دي.
- علشان يتم تصوير مشاهد الأبيض وأسود في الفيلم بنفس دقة مشاهد الألوان، شركة كوداك العالمية، صممت أول كاميرا IMAX في العالم متخصصة للتصوير بالأبيض وأسود
- الممثل جوش هارتنيت اللي بيشارك في الفيلم، كان واحد من ٣ مرشحين لفيلم Batman Begins اللي أخرجه كريستوفر نولان. لكنه اعتذر قبل بداية تصوير الفيلم، وبعد كده أعلن عن ندمه على الاعتذار وتمنى لو تجمعه الفرصة تاني مع نولان وده اللي حصل من خلال فيلم Oppenheimer. الغريب أن معاد العرض العالمي للفيلم هو نفس يوم عيد ميلاد هارتينت!
- فريق عمل الفيلم بيتضمن ٥ فائزين بالاوسكار: كيسي أفليك، والسير كينيث براناه، ومات ديمون، وغاري أولدمان، ورامي مالك، وثلاثة مرشحين لجائزة الأوسكار: روبرت داوني جونيور، وتوم كونتي، وفلورنس بوج.
- الفيلم هو ثاني أفلام نولان اللي بتتناول أحداث الحرب العالمية الثانية بعد Dunkirk المنتج سنة ٢٠١٧
- أول فيلم لكريستوفر نولان يحصل على تصنيف رقابي R بعد Insomnia انتاج ٢٠٠٢
- نولان أعلن أن الفيلم تم تصويره بدون خدع CGI. وده معناه أن حتى مشاهد الانفجار النووي تم تصويرها بشكل أشبه ما يكون بالحقيقة بدون تدخل للخدع السينمائية.
كل اللي علينا دلوقت هو أننا نعد الأيام الباقية. ونبدأ نجهز نفسنا لمغامرة سينمائية جديدة ومجنونة. مع فيلم Oppenheimer
