مقالات كايرو 360

فيلم One Battle After Another

قراءة سهلة

التقييم: ٤ من ١٠

عجبك شوف: أفلام تانيه ايقونية لليوناردو ديكابريو زي Killers of the Flower Moon و Don’t Look Up

علشان تبقى عارف: تقييم الفيلم على موقع IMDB هو ٨.٣ من ١٠ بناء على رأي حوالي ١١٠ الف مستخدم للموقع.

* * *

فيلم One Battle After Another بيحكي عن مجموعة من اليساريين الأمريكان المتطرفين، اللي عايزين ينشروا الفوضى وبيشتغلوا ضد الحكومة، وضد أي قانون بتعمله. من خلال استخدام العنف وعمليات الخطف والتفجير، اتنين من أهم الناس في المجموعة دي هما ليوناردو ديكابريو (بوب) وحبيبته الحامل (بيرفيديا) اللي قامت بدورها تيانا تيلور، واللي بيتورطوا في عملية من العمليات اللي مش عايزين نحرق تفاصيلها عليكم، لكن نتيجتها بتكون ان ديكابريو بيقرر يربي بنته لوحده وبهدوء، وبيبعد تماما عن عمليات المجموعة اليسارية دي، لمدة ١٦ سنة كاملة.

ولما بيحس ان أموره بقت ماشية كويس وانه بقى بعيد عن المطاردة القانونية، بيظهر في الصورة الظابط (ستيفن) اللي قام بدوره شون بن، واللي بيقرر يتتبع المجموعة دي بحكم وظيفته من ناحية، وبحكم موضوع شخصي كمان بيربطه بالمجموعة اللي بيطاردها طول ال ١٦ سنة دي. مش عايزين برضو نحرقه عليكم. وهنا نقدر نقول أن الفيلم بدأ فعلا، لما بنشوف المطاردة الطويلة والمستمرة بين كل أطراف الفيلم لبعض.

فكرة المطاردة كانت هي السبب الأساسي اللي خلانا مش حاسين بالملل واحنا بنتفرج، بس برضو المخرج بول توماس اندرسون كان محتاج أفكار مساعدة جنب فكرة المطاردة علشان يخلي المشاهد العادي اللي مش مهتم بجماليات الصورة والأفكار الفلسفية اللي ورا المشاهد وجمل الحوار، متمسك بالمتابعة بدون ما يحس بملل. وهو ده نظام اندرسون في الأفلام اللي بيقدمها، انه جاي من مدرسة بتهتم بالجماليات والرمزيات أكتر من اهتمامها بتقديم أحداث متتابعة ومتلاحقة وتخلي أنفاسنا محبوسة طول الوقت، وهي دي النقطة اللي هاتضايق المشاهد التقليدي، أنه ممكن مايلاقيش اللي كان متوقعه بنسبة ١٠٠٪.

هل معنى كده أن one battle after another فيلم ممل؟ هابقى ظالم جدا لو قولت كده. لكن في نفس الوقت ومع زمن الفيلم اللي بيقرب من ٣ ساعات، ومع فكرة اننا بنكتشف ان ديكابريو مش أهم ممثل في الفيلم رغم استحواذه على نصيب الأسد من المشاهد اللي بيظهر فيها من حيث العدد، لكن في رأينا مثلا ان شون بن قدم أداء أحسن منه بكتير، وفعلا كان سارق الكاميرا في كل مشهد ظهر فيه. كمان تشيس انفينتي عملت دور حلو جدا وأداء تمثيلي ممتاز، أما أكتر واحد السيناريو خدمه علشان يعمل دور ممتاز هو في رأينا بينيسيو ديل تورو. واللي شال مع ديكابريو الجانب الكوميدي للفيلم. والغريب اننا كنا داخلين الفيلم ومش متوقعين يكون فيه كمية الكوميديا دي. لكن حقيقي الكوميديا في الفيلم كانت كتير وكانت مختلفة.. يعني نقدر نقول ان دي الكوميديا على طريقة بول توماس اندرسون.

بالكلام عن بول توماس اندرسون بقى.. عجبنا قوي كادرات الفيلم وطريقة التصوير، واستخدام الإضاءة علشان يخلي شغله أسهل، زي مثلا المشاهد اللي اتصورت في ضلمة شبه تامة في المطاردات اللي تمت بين البيوت، دي مشاهد كان لازم دوبلير يعمل فيها دور ديكابريو، فا اندرسون استعمل الإضاءة الخافتة علشان يمرر المشاهد دي بدون ما المُشاهد ما يحس، وبدون هو ما يفقد الفرصة انه يقدم مشاهد قوية.

الموسيقى كمان في الفيلم كانت ملفته جدا، وكنا قاعدين بعد نهاية الفيلم بسمع الموسيقى مع التتر، كمان زوايا التصوير واستخدامها في مشهد المطاردة بالعربيات في اخر الفيلم كانت ملفتة وجميلة ومتنفذة باتقان واحترافية عالية جدا.

مش عايزين نستفيض في الكلام عن الفلسفة في الفيلم علشان ما نحرقش احداث. بس الفيلم اثار جوانا أفكار كتير فضلت في دماغنا لفترة طويلة بعد المشاهدة، ودي من الحاجات اللي بنعتبر بسببها الفيلم اللي بنشوفه انه ناجح، انه قادر يسيب جوانا فكرة أو حاجة معينة نفكر فيها بعد ما تخلص الأحداث، وده كان ظاهر في مشهد (الساعة كام) وفي فكرة هل الاب هو الأب البيولجي اللي كان السبب في مجينا الدنيا، ولا الأب اللي بيربينا ويكون جنبنا في كل تغيرات حياتنا؟ وكمان فكرة ان منتهى التطرف على يسار السلطة، هايأدي لظهور حركة متطرفة برضو بس على العكس، وتطرفها بيكون مع النظام الحاكم أو حتى منحاز لفكرة عنصرية أو عرقية. كل دي معاني كنا بنفكر فيها بعد ما خلصنا فرجة على one battle after another، وسامحونا لو مش قادرين أتكلم عن المعاني دي بحرية علشان حرق الأحداث

فيلم one battle after another مش احسن فيلم في ٢٠٢٥. لكنه برضو فيلم مرشح بقوة انه يكون من اهم واحلى أفلام السنة، بس احنا لسه في بداية موسم الأفلام القوية اللي هاتنافس على الاوسكار وده معناه انه ممكن يقابل منافسة محترمة في موسم سينمائي جميل جدا ومش سهل ان حد يطلع الأول فيه.

زر الذهاب إلى الأعلى