الست : نقدر نقدم سيرة ذاتية بدون تجميل أو تجريح؟
التقييم: ٤ نجوم
عجبك شوف: مسلسل (كوكب الشرق) بطولة الفنانة صابرين عن حياة أم كلثوم
علشان تبقى عارف: حسب موقع السينما دوت كوم. الفيلم حقق لحد دلوقت حوالي ٣١ مليون جنيه إيرادات
* * *
محمد البدري
حبينا نستنى فترة مناسبة قبل ما نكتب لكم عن فيلم الست. علشان احنا فاهمين كويس ان في وقت تصدر أي عمل فني للترند صوت العقل بيكون غايب الى حد بعيد، والأراء بتكون متحمسة بزيادة وانفعالية شويتين. ولما ييجي الكلام عن (الست) أم كلثوم فا لازم نفهم أن الحماس هايكون مبالغ فيه أكتر وأكتر، لأن (أم كلثوم) مش مجرد مطربة مصرية، لكن ممكن نقول إنها (حدث) فني استثنائي وفريد، وظاهرة مش هاتتكرر، مش بس على الصعيد الفني، لكن على الصعيد الإنساني والسياسي والتاريخي كمان. تعالوا نعرف أكتر من خلال موضوعنا عن فيلم الست.
مش هانقول المقدمة التقليدية اللي بنعرفكم فيها ان فيلم الست بيتكلم عن حياة (أم كلثوم) وتأثيرها في المجتمع المصري والعربي – والعالمي كمان- علشان كل دي معلومات معروفة بمجرد قراءة اسم الفيلم. ويمكن ده التحدي اللي قابل صناع العمل نفسهم، إن القصة من الألف للياء محروقة تماماً على المُشاهد، بالتالي التحدي الأهم أمام مؤلف فيلم الست أحمد مراد، كان انه يختار زاوية مختلفة للحكي، ولقطة أولى تخطف المُشاهد وتشجعه على تكملة المشاهدة للنهاية.
اللقطة دي كانت حفلة مسرح الأولمبيا اللي قدمتها أم كلثوم في باريس سنة ٦٧. بعد شهور من هزيمة عسكرية تقيلة تلقتها مصر. اللحظة دي كانت فارقة مش بس في حياة أم كلثوم، لكن كمان في حياة الشعب المصري اللي قرر ينهض من هزيمته ويعيد تسليح الجيش ويستعد للمعركة الفاصلة.
من ناحية تانية أم كلثوم كانت عارفه كويس مدى تأثيرها على الشعوب العربية، وقررت تخصص دخل الحفلة بالكامل للمجهود الحربي، ودي كانت مجرد خطوة ضمن خطوات كتير عملتها أم كلثوم علشان تستغل شعبيتها في خدمة بلدها. لكن من ناحية تانية المنظمات اللي من مصلحتها ان مصر ماتقفش تاني على رجلها، كانت عايزه الحفلة تبوظ أو على الأقل لا يتم الاهتمام بيها إعلاميا بشكل كبير.
كل المواقف المتأزمة دي كانت حاضرة في كواليس الحفلة بشكل كبير. لحظات بسيطة من سوء الفهم بين مدير المسرح وبين أم كلثوم كانت فعلا هاتؤدي لنهاية الحفلة قبل ما تبدأ، هنا بنشوف وش تاني للـ (ست) القادرة تفرض إرادتها ورأيها ورؤيتها الفنية والإنسانية على أي حد. لكنها مش هاتقدر تتعامل مع موقف غريب هايحصل لها على المسرح أثناء الغناء، ومش عايزين نحرق عليكم الحدث ده علشان تستمتعوا بمشاهدة الفيلم.
اختيار المشهد الافتتاحي أنه يكون لحظة البداية لفيلم الست كان اختيار موفق جدا من أحمد مراد، مع إخراج أكتر من رائع لمروان حامد بشكل قدر يجمع فيه كل عناصر التشويق دي في لقطات متتابعة وقطعات مونتاج ذكية، خلتنا واثقين ان المشهد الافتتاحي لفيلم الست يعتبر أحسن مشهد افتتاحي لفيلم عربي في ٢٠٢٥. وبكده نجح الثنائي (حامد – مراد) في الاختبار الأول، وسرقوا اهتمام المشاهد علشان يسحبوه للمنطقة اللي عايزين يتكلموا عنها أكتر.
بنشوف في مشاهد فلاش باك حياة أم كلثوم قبل الشهرة، وازاي أبوها الشيخ إبراهيم البلتاجي (سيد رجب) كان مضطر يخليها تلبس هدوم الأولاد علشان ماحدش يعرف انها بنت. لأن كان من غير المعروف خالص أيامها إن بنت تحيي الحفلات والأفراح اللي بتستلزم أن المطرب يكون صوته قوي وأداؤه على المسرح رجالي جدا.
الفيلم بتتقاطع فيه الأحداث مابين الذكريات القديمة لأم كلثوم، وبين الأحداث الحالية اللي بنشوف فيها إن رغم بلوغ أم كلثوم لقمة المجد الفني، لكن المشكلات والأزمات مش بتسيبها في حالها. وبنشوف تعمق أكبر في حياتها العاطفية والناحية الإنسانية فيها.
فيلم الست بيركز على فكرة ازاي الإنسان يقوم تاني من السقطات الكبيرة في حياته، وازاي الموهبة الفذة زي ما بتعود على صاحبها بمميزات كتير لها علاقة بالشهرة والفلوس، لكن برضو بتسرق منه حاجات كتير زي الحياة الاجتماعية والعاطفية، وبتخليه عرضة أكتر للوحدة والمرض.
من ناحية تانية الفيلم كان قدامه تحديات كتير، لازم نتكلم عنها باستفاضة أكتر.
أولا: فكرة انتظار الناس لتطابق ١٠٠٪ في الشكل بين منى زكي وام كلثوم. وده كان من التحديات الكبيرة اللي خلت الفيلم يتواجه بعاصفة من النقد بمجرد طرح التريلر، بدون حتى انتظار عرض الفيلم في الصالات. والحقيقة اننا لازم نعترف ان منى زكي مش شبه أم كلثوم بنسبة ١٠٠٪، لكن قدرت توصل لدرجة عالية جدا من تقمص روح الشخصية، بشكل خلانا مش بنلتفت للتشابه في الشكل غير في المشاهد الأولى بس للفيلم، بعد كده بتاخدنا الأحداث في حاجات أهم بكتير من مجرد التشابه الشكلي.
وعلى فكرة. أحمد زكي لما قدم (ناصر ٥٦ – أيام السادات – حليم) مكانش شبه الشخصيات اللي قدمها بنسبة ١٠٠٪، لكن استمتاعنا بتجسيد روح الشخصية كان أكتر بكتير من المقارنة في الشكل بين الفنان والشخصية الحقيقية.
ثانيا: قرار أحمد مراد ومروان حامد في تناول شخصية أم كلثوم كإنسانة عادية لها مميزات وعيوب، ونواقص ومشاكل وصراعات داخلية وخارجية، القرار ده فتح عليهم باب هجوم ضخم على السوشيال ميديا، لأن ناس كتير – منهم الفنان محمد صبحي مثلا- مكانوش قابلين فكرة اننا نجيب أم كلثوم بتدخن مثلا، أو ان عندها مشاكل مع أبوها أو أخوها، وحاجات تانيه كتير مش عايزين نحرقها عليكم علشان تتابعوا الفيلم.
لكن من ناحية تانيه احنا شايفين ان لازم يكون عندنا تناول أكتر موضوعية شوية في أعمال السيرة الذاتية اللي بنقدمها في أعمالنا الفنية. ودي حاجة مكانتش موجودة في أعمال كتير تناولت شخصيات زعماء زي عبد الناصر والسادات، أو حتى المسلسل والفيلم اللي اتكلموا عن أم كلثوم قبل كده، كلها أعمال جابت الجانب الجيد من الشخصيات دي. وحتى لما جابت مواقف سلبية كانت على استحياء شديد. وده بيدي أبعاد ملائكية مش موجودة في الواقع، لشخصيات احنا عارفين كويس انهم دخلوا صراعات ومكانوش محاطين – أكيد – طول الوقت بالملائكة المُخلصين من كل مكان!
ثالثا: مش بس بمجرد طرح إعلان الفيلم، لكن من مجرد طرح فيلم (الست) كمشروع أولي هايكتبه أحمد مراد ويخرجه مروان حامد وتقوم ببطولته منى زكي، وناس كتير مابطلتش هجوم على الفيلم، لأسباب أبعد ما يكون عن السبب الوحيد المسموح إن الفيلم يتم الهجوم عليه – أو مدحه- وهو السبب الفني، لكن شوفنا هجوم على الفيلم بسبب بعض الجهات اللي شاركت في انتاجه، أو مؤلفه، أو مخرجه، أو بطلته. وده في رأينا سبب تصدر فيلم الست للترند لفترة طويلة تزامنت مع عرضه.
وزي ما قولنا احنا مش ضد أن الفيلم يتم انتقاده أو مدحه لأسباب فنية. ودي مساحة حرة أي حد يقدر يقول فيها رأيه زي ماهو عايز، لكن المهم إن الرأي ده مايكونش السبب فيه عوامل تانيه غير العامل الفني بالأساس.
بعيداً عن كل ده. الفيلم من الناحية الفنية جميل جدا.. ومن أحلى مافيه الموسيقى التصويرية اللي اعتمدت على إعادة توزيع أغاني أم كلثوم باستخدام الهيفي جيتار، وده كان اختيار جيد جدا من هشام نزيه وفيه شجاعة كبيرة.
الأداء التمثيلي لمنى زكي في دور أم كلثوم كان مُبهر، لكن لسبب أو لأخر كانت متمسكة باللكنة الريفية في كلامها طول الوقت ورغم تقدم شخصية أم كلثوم في السن وإقامتها في العاصمة لوقت أطول، وده قرار غريب من صناع الفيلم لأننا سمعنا لقائات كتير لأم كلثوم ومكانش عندها أي لكنة في كلامها.
عمرو سعد ماقدمش شخصية جمال عبد الناصر بشكل كويس، وكان ناقصه كتير من هيبة عبد الناصر وطريقته المميزة في الكلام، لكن محمد فراج وتامر نبيل وأحمد أمين عملوا أدوار ممتازة وتحسب لهم، وكل واحد فيهم كان عارف كويس جدا يمسك مفاتيح الشخصية اللي بيقدمها مش بس يلعب على التشابه الشكلي بينه وبين الشخصية.
عجبنا جدا التوليفة اللي اتعملت مابين الأدوار الأساسية زي أم كلثوم وأحمد رامي و شريف صبري باشا، وبين الأدوار الأقل شوية من حيث المساحة وبين الشخصيات اللي ظهرت كضيوف شرف ومنهم مثلا أحمد حلمي اللي قدم دور صغير لكن مؤثر في الأحداث ولعب دور مهم في كسر (الجدية) اللي اتسم بيها معظم الفيلم.
الديكورات واختيار زوايا التصوير وحركة الكاميرا كانت ممتازة، كمان المونتاج لعب دور مهم مع المؤثرات الصوتية علشان ينقلونا لزمن الأحداث بدون ما نحس بأي (نشاز) في أي تفصيلة مهما كانت صغيرة.
وأخيرا..
فيلم أم كلثوم هايكون تجربة سينمائية ممتازة لو قررت تتفرج على الفيلم بدون تحيزات مسبقة. بدون ما تكون رأي مسبق أن الفيلم حلو أو وحش. ننصحكم بمشاهدته بدون مقارنة مع أعمال تانيه لأنه عمل ممتاز يستحق يتشاف ويتقيم بدون مقارنات أو أحكام مسبقة.



