Thrash : الفك المفترس في عباءة هندية!
التقييم: ٣ نجوم من ٥
عجبك شوف: The Meg
علشان تبقى عارف: تقييم الفيلم على IMDB هو ٥ من ١٠ وشارك في التصويت حوالي ٢٠ ألف مستخدم للموقع
محمد البدري
مهما الزمن عدى، ومهما تيمات الأفلام اختلفت وتنوعت، هتفضل تيمة “القرش المفترس” أو الكائن البحري الخارج عن السيطرة، واحدة من أكتر التيمات اللي بتجذب الجمهور وبتحقق مشاهدة عالية. علشان كده ما كانش غريب إن فيلم Thrash يحتل مكانة متقدمة ضمن قائمة الأفلام الأكثر مشاهدة في مصر على نتفليكس. الفكرة ببساطة مغرية جدًا لأي متفرج: إعصار مدمر، مدينة محاصرة، ومجموعة من الناس بيحاولوا ينجوا من كارثة طبيعية، ليكتشفوا إن الخطر مش جاي من الطقس بس، لكن كمان من هجوم شرس لأسماك القرش.
فيلم Thrash بيقدم قصة مباشرة وواضحة من أول لحظة. الأحداث بتدور حوالين إعصار عنيف بيضرب مدينة أمريكية، وبيجبر بعض السكان على البقاء فيها رغم التحذيرات الرسمية. ومع تصاعد الكارثة، بيلاقوا نفسهم مش بس في مواجهة رياح وفيضانات وفوضى، لكن كمان قدام مجموعة من أسماك القرش المفترسة اللي لاقت نفسها فجأة وسط عدد كبير من البشر، وكأنهم بقوا وليمة مفتوحة في توقيت كارثي جدًا.
واضح جدًا إن المؤلف والمخرج تومي وركولا فاهم النوع ده من الأفلام كويس، لأنه أصلًا معروف بأعماله اللي بتميل للرعب التجاري المباشر، من غير تعقيد كبير أو فلسفة زيادة عن اللزوم. ورغم إن رصيده مش ضخم، لكن أفلامه زي Violent Night وDead Snow 2: Red vs. Dead بتأكد إنه بيحب النوعية دي من الأعمال اللي بتعتمد على الإيقاع السريع، والمواقف المتطرفة، والمشاهد اللي فيها توتر ورعب واضح. وده فعلًا اللي شوفناه في Thrash.
من أول الفيلم، تومي وركولا بيحاول ما يسيبش المشاهد ياخد نفسه. بعد بداية سريعة بتعرفنا على خلفيات الشخصيات الأساسية، بنشوف تنوع في الأبطال ما بين أم شابة على وشك الولادة، وأطفال عايشين حياة صعبة مع أسرة بديلة سيئة جدًا في معاملتها، ومعاهم شخصية داكوتا، اللي بتقدمها ويتني بيك، واللي تعتبر من أهم الشخصيات المحركة للأحداث في الفيلم. التنوع ده كان ممكن يدي مساحة أكبر للتعاطف مع الشخصيات، وفعلاً الفيلم في البداية بيحاول يقدم حالة التوتر بشكل معقول.
لكن مشكلة Thrash الأساسية بتبدأ تظهر بوضوح من منتصف الفيلم تقريبًا. لأن المخرج، في محاولته لتقديم فيلم مشوق ومليان لحظات صادمة، وقع في فخ المبالغة. وبدل ما بعض المشاهد تفضل مرعبة ومؤثرة، اتحولت في لحظات كتير لمشاهد مبالغ فيها بشكل يخلي المتفرج يضحك بدل ما يتوتر. والمبالغة هنا كانت واضحة جدًا لدرجة إنها أضعفت تأثير عدد من أهم لحظات الفيلم، وخلّت Thrash يفقد جزء من جديته اللي كان بناها في البداية.
كمان من نقاط الضعف الواضحة في Thrash إن الفيلم بيعتمد بشكل أساسي على فكرة أسماك القرش، لكن في المقابل، ظهورها على الشاشة ما كانش بالقوة الكافية ولا بالحضور البصري اللي يليق بفيلم من النوع ده. وده ممكن يكون راجع لطبيعة الميزانية المتوسطة، لكن المشكلة إن جمهور 2026 بقى متعود على مستوى أعلى جدًا من المؤثرات البصرية والخدع السينمائية، وبقى عنده سقف توقعات مرتفع، خصوصًا لما يكون الفيلم قائم من الأساس على فكرة بصرية زي هجمات القرش. علشان كده، ضعف تقديم القروش بصريًا كان من أكتر الحاجات اللي أثرت على تجربة المشاهدة في Thrash.
هل ده معناه إن Thrash فيلم سيئ؟ الحقيقة لا. في رأيي، Thrash فيلم متوسط، عنده فكرة جذابة، وإيقاع سريع، وقصة بسيطة ما بتلفش كتير حوالين نفسها. ينفع جدًا للي عايز يتفرج على فيلم رعب تجاري خفيف في سهرة ويك إند، من غير ما يستنى عمق كبير أو حبكة معقدة. هو فيلم بيتشاف، وبيقدّم قدر معقول من التوتر والإثارة، لكن في نفس الوقت ما يقدرش يوصل لمستوى الأفلام الأيقونية اللي تناولت رعب أسماك القرش، وعلى رأسها طبعًا فيلم Jaws لستيفن سبيلبرج.
يعني لو داخل تتفرج على Thrash وأنت متوقع تجربة قوية جدًا أو فيلم هيعيش طويل في الذاكرة، فممكن تحس ببعض خيبة الأمل. لكن لو هدفك فيلم سريع، مباشر، وفيه كوارث وهجوم قروش ومواقف بقاء، فغالبًا Thrash هيقدملك اللي أنت مستنيه، حتى لو بشكل متوسط مش أكثر.



