مقالات كايرو 360

فيلم Trap : غياب المنطق أخد الفيلم في حتة تانية!

قراءة سهلة

التقييم: ٣ نجوم

عجبك شوف: فيلم Red Eye للمخرج (ويس كرافن)

علشان تبقى عارف: (جوش هارتنت) ما اتفرجش على أي أعمال فنية علشان يحضّر للدور، لأنه كان عايز يقدّم الشخصية بطريقته الخاصة، لكنه عمل بحث عن الامراض النفسية وقرأ كتب عن القتلة المتسلسلين.

* * *

لما بتقرأ كلمة (قاتل متسلسل) ايه الصورة الذهنية اللي بتيجي في بالك؟ شخص نظراته حادة وجسمه ضخم، عصبي في كلامه وعنيف في ردود أفعاله. وكل حاجة فيه بتقول – بشكل أو بأخر – إنه مجرم أو يستحسن الابتعاد عنه. فيلم Trap بينسف تماماً الفكرة الذهنية دي.

فيلم Trap بيحكي عن كوبر (جوش هارتنت) الأب المحب لبنته، واللي بيصطحبها معاه علشان يحضروا حفلة لمطربتها المفضلة (قامت بالدور سالكا شيامالان). وفي منتصف الحفلة بنبدأ نحس إن الإجراءات الأمنية أكتر تعقيداً من اللي المفروض تكون عليه، وبنكتشف مع استمرار الأحداث إن الحفلة كلها مجرد فخ لاستدراج قاتل محترف معروف باسم (الجزار) وبنكتشف كمان إن القاتل ده ماهو إلا (كوبر) الأب الطيب اللي واخد بنته علشان تحضر الحفلة!

من أحلى المميزات في فيلم Trap انه مش بياخد وقت طويل علشان نوصل معاه للحقيقية دي. الفيلم من أول لقطة لأخر لقطة سلسلة لا تنتهي من الاثارة وحبس الأنفاس، وده اللي اتعودنا عليه من مخرج بحجم إم. نايت شيامالان صاحب أعمال زي The Sixth Sense و The Happening وغيرها.

لكن من ناحية تانيه ماعجبناش في Trap الاستسهال والاعتماد على الصدف المبالغ فيها لتمرير مواقف مش منطقية، وعدم المنطقية كان العيب الأساسي من وجه نظرنا في الفيلم وخصوصا في النصف التاني منه، بمعنى إننا بنشوف شخص واحد بس قادر يخدع مدينة كاملة تقريبا بكل من فيها من رجال أمن ومواطنين بمنتهى السهولة وبدون الوقوع في أخطاء. بالتالي لازم اللي يتفرج على الفيلم يعمل حسابه انه هايحتاج (يكبر دماغه) عن كتير من المواقف اللي بتحصل.

لكن الأمر اللافت للنظر واللي يستحق الإشادة، اهتمام Trap بإظهار دور الطب النفسي في فهم دوافع الجريمة وتحديد الطريقة اللي بيفكر بيها كل مجرم علشان يعمل جريمته، والتنبيه على فكرة ان الشخصية الإجرامية مش محتاجه تظهر بملامح غاضبة وأفعال عنيفة، وإن ممكن الشخص الهادي المبتسم اللي رايح مع بنته حفلة غنائية، يكون هو الكابوس المسئول عن سلسلة من الجرايم الغامضة.

زر الذهاب إلى الأعلى