فيلم Elize: Shadows of a Woman : هل ممكن نلاقي مبرر للجريمة؟
التقييم: ٣ نجوم
عجبك شوف: وثائقي نتفليكس عن نفس الجريمة Elize Matsunaga: Once Upon a Crime
نصيحة كايرو ٣٦٠: تقييم الفيلم على IMDB هو ٦ من ١٠ وشارك في التقييم حوالي ٢٠٠٠ مستخدم للموقع
من المشهد الأول لفيلم Elize: Shadows of a Woman بنشوف جريمة قتل واحدة لزوجها، بالمباشرة دي وبالبساطة دي بيعرفنا صناع الفيلم، إن الإثارة أحيانا ملهاش علاقة بعدم معرفة المشاهد للقصة، لكن الإثارة كلها بتكمن في الإجابة على السؤال: ليه حصلت الجريمة؟ وايه اللي حصل بعدها؟ وبالنسبة لنا أكبر إثارة ممكن تحصل لنا هي لما عرفنا ان أحداث الفيلم مبنية على قصة حقيقية، وجريمة هزت البرازيل لفترة طويلة، ولسه الناس بتتابع أي أخبار عنها لحد اليوم، لأن القاتلة لسة عايشه.
فيلم Elize: Shadows of a Woman بياخدنا في رحلة في حياة (إليز)، الشابة اللي بتعيش حياة مضطربة، وبتشتغل فتاة ليل، ومن خلال شغلها بتتعرف على (زبون) غني جداً، وبيتعلق بيها لدرجة انهم بيتجوزوا، وبتلاقي إليز من خلاله الفرصة اللي تقدر تبدأ من خلالها حياة جديدة نضيفة. لكن الأمور مش بتستمر بالمستوى ده من الإيجابية، وإلا مكانتش القصة استحقت تتحول فيلم.
حياة إليز الجديدة مش بتفضل وردية علطول، مع الوقت بتكتشف ان جوزها بيخونها مع ستات تانية، اتعرف عليهم بنفس الطريقة اللي اتعرف عليها أول مرة. ولما واجهته بخيانته ليها فكرها بماضيها، وانها ماتختلفش حاجة عن اللي بيعرفهم عليها، ومن هنا بتبدأ إليز تحس ان حياتها اتحولت لجحيم، وتبدأ تخطط لقتله.
صناع الفيلم قسموا الفيلم الى ٤ فصول بشكل واضح، وكل فصل بيتكتب اسمه على الشاشة، في إشارة واضحة للأربع قطع اللي الزوجة قسمت جوزها ليهم. تفصيلة صغيرة و (سوداوية) شوية لكنها بتدينا انطباع ان صناع الفيلم مش عايزين يعملوا مجرد نسخة تمثيلية من الفيلم الوثائقي اللي تناول نفس الجريمة واتعرض على نتفليكس برضو، وكان عنوانه Elize Matsunaga: Once Upon a Crime. لكنهم عايزين يعملوا عمل قائم بذاته وله بصمة خاصة بيه.
الأداء التمثيلي لـ (لورينا كومبارتو) في دور (اليز) الزوجة كان هايل، وقدر عند لحظة معينة يحسسنا بالتعاطف مع واحدة المفروض انها قاتلة. وده معيار مهم نقدر نقيس بيه قوة الأداء التمثيلي في أي عمل، هو مدى قدرة الممثل على انه يخلينا نتعاطف (أو لا نتعاطف في أحيان تانيه) مع الشخصية اللي بيقدمها.
لكن أمتع حاجة شوفناها في الفيلم هي الجوانب النفسية والإنسانية اللي فيه، يعني بنشوف ازاي (اليز) كانت بتعاني من سوء معاملة من ابوها، شعورها المستمر بالخذلان وانها ماتستحقش الحب، كان من العوامل المهمة اللي خلقت شخصيتها الإجرامية بعد كده، ودي نقطة مهمة بيتم التركيز عليها دايما.
التشابه الكبير بين قضية إليز في البرازيل وقضية المحامية اللي قتلت والدتها بطريقة بشعة، واللي احتلت الترند في الأيام الأخيرة في مصر، بيورينا ان الجريمة مالهاش علاقة بمنطقة جغرافية أو زمن معين، الجريمة بتنشأ من مجموعة من العوامل، منها التربية، والحالة النفسية، والمشاكل اللي شافها الانسان على مدار حياته، وحاجات تانيه كتير بتخلي الشخص ممكن يتحول في لمح البصر من انسان برئ الى قاتل.
فيلم Elize: Shadows of a Woman اللي احتل مرتبة متقدمة في الأعمال الأكثر مشاهدة على نتفليكس، يعتبر تجربة كويسة للناس اللي عايزه تتفرج على عمل مشوق بدون ملل، مع جرعة اثارة وعنف متوسطة، لكنه مش صالح للمشاهدة الأسرية أو للمشاهدين المحافظين.



