مقالات كايرو 360

Hope : فيلم كوري بمذاق هندي!

قراءة سهلة

التقييم نجمة واحدة

عجبك شوف: The host و Predator و The Mist

لو بتختار أفلامك على أساس حماس الناس على السوشيال ميديا، فغالبًا Hope وصل لك باعتباره حدث سينمائي ماينفعش يفوتك. فيلم وحوش كوري، من مخرج The Wailing ، وحواليه كلام كتير عن الأكشن والجنون والتجربة المختلفة. وصفة تشجع أي حد يحب السينما، لكن بعد كل الوعود دي، صعب مانسألش: هو فين الفيلم الاستثنائي اللي الناس بتتكلم عنه؟

فيلم Hope، إنتاج ٢٠٢٦، من كتابة وإخراج نا هونغ جين، وبيشارك في بطولته هوانغ جونغ مين، وجو إن سونغ، وجونغ هو يون، اللي عرفها الجمهور من Squid Game. الحكاية بتدور في بلدة كورية بيهاجمها مخلوق غامض، وبيحاول رئيس الشرطة ومجموعة من الصيادين يتعقبوه، وسط دمار بيكبر ومواجهة واضح من البداية إن محدش مستعد لها.

الفكرة بسيطة ومناسبة جدًا لفيلم مشوق. مش محتاجين مجهود كبير علشان نهتم بناس محاصرة مع وحش مجهول، خصوصًا لما يكون الخطر قريب طول الوقت. والبداية فعلًا عندها القدرة إنها تثير الفضول، لكن الفيلم بيطول في استغلال الفضول ده لحد ما بيقلبه لنفاذ صبر.

أكتر حاجة ضايقتنا هي تأخير ظهور الوحش بوضوح لحوالي ساعة. طول الوقت بنتابع آثار هجماته، ونسمع أصوات الخطر، ونلاحق مع الشخصيات حاجة الفيلم مصمم يخبيها. أول شوية ده بيخلق توتر، إنما بعد كده بنبقى مستنيين الكشف أكتر ما إحنا مهتمين بالمطاردة نفسها. فيه وقت طويل بيضيع على تأجيل لحظة إحنا عارفين إنها جايه!.

مش مطلوب من فيلم وحوش إنه يكشف كل أوراقه من أول عشر دقايق، لكن لازم الانتظار يكون له مقابل. كل مشهد قبل الظهور المفروض يزود خوفنا أو يخلينا نرتبط بالشخصيات أكتر. لكن مع Hope احنا بنعيش في جو المُخاطرة منغير مانبقى عارفين مين الشخصيات دي وليه المفروض نتعاطف معاها وايه هي الخلفيات اللي جاية منها. ودي كانت مشكلة كبيرة في السيناريو.

والوحش فعلًا مش قد الانتظار. المؤثرات الخاصة مستواها متواضع، وفي لحظات شكل المخلوق وحركته بيشدوا انتباهك بعيد عن المواجهة. بدل ما تركز في الشخصيات اللي بتحاول تنجو، بتلاقي نفسك بتبص على الصورة وتحاول تقتنع إن الكائن ده موجود معاهم في نفس المكان. ودي مشكلة مؤثرة جدًا في فيلم معتمد على حضوره بالشكل ده.

بعدها، Hope بيحاول يعوض بزيادة كل حاجة: حركة أكتر، دمار أكتر، ومواجهات أطول. لكن المبالغات كتير لدرجة بتضعف الإحساس بالخطر. صحيح إننا عارفين اننا بنشوف فيلم خيال علمي، ومستعدين نتقبل عالمه، لكن محتاجين نحس إن النجاة لها ثمن، وإن الشخصيات ممكن تخسر فعلًا. لما التصعيد يبقى مستمر بنفس الحدة، بيتحول مع الوقت لخلفية مزعجة بدل ما يفضل مصدر توتر.

حتى المطاردات، اللي المفروض تكون أهم عناصر المتعة، بتطول أكتر من اللازم. فيه لحظات كان ممكن تسيب أثر أقوى لو انتهت بدري، لكن الفيلم بيكمل فيها لحد ما يستنزفها. وبالتدريج، بنبقى بنتابع مجهود واضح على الشاشة من غير ما نحس بالحماس اللي المفروض المجهود ده يولده.

الخلط بين الرعب والكوميديا كمان مش مستقر. بعض المواقف فيها خفة دم لطيفة، خصوصًا لما الشخصيات تحاول تتعامل مع كارثة أكبر من قدرتها، لكن الهزار أحيانًا بييجي في وقت يلغي جدية المواجهة. ودي حاجة مش كويسة

احنا فاهمين إن فيه ناس استمتعت بالفوضى اللي قدمها فيلم Hope، لكن مش فاهمين ليه الفوضى دي اتحولت على السوشيال ميديا لدليل على عبقرية الفيلم. بالنسبة لنا، مستواه ضعيف، ومشاكله أوضح من إننا نتجاهلها على أساس ان دي تجربة مجنونة. ممكن نختصر مشاكل الفيلم في ان الوحش اتأخر، والمؤثرات خذلته، والمبالغات خلّت الفيلم أطول وأقل متعة. أما الضجة اللي حصلت على الفيلم، فكانت بصراحة شديدة محتاجة فيلم أقوى من كده.

زر الذهاب إلى الأعلى