مراجعة فيلم Tuner: لما الموهبة تفتح الباب للجريمة
التقييم: 4 من 5
نصيحة كايرو ٣٦٠: ننصحكم تتفرجوا على الفيلم بسماعات جيدة أو نظام صوت قوي، لأن تصميم الصوت مش مجرد عنصر مكمل للأحداث، لكنه جزء أساسي من الحكاية نفسها
عجبك شوف: فيلم Baby Driver إنتاج 2017، اللي بيجمع بين الموسيقى والجريمة، وبيعتمد على الصوت والإيقاع في صناعة التشويق.
تخيل إنك تمتلك موهبة خارقة في السمع، تخليك قادر تميز أصوات محدش غيرك يقدر يسمعها. ممكن تعتبرها نعمة من ربنا، لكن إيه اللي ممكن يحصل لو الموهبة دي دمرت مستقبلك، وفي نفس الوقت فتحت لك أبواب عالم الجريمة؟ السؤال ده بيحاول يجاوب عليه فيلم Tuner، اللي بيقدم حكاية مختلفة بتجمع بين الموسيقى والدراما والتشويق.
الفيلم من إخراج (دانيال روهر)، وبطولة (ليو وودال) و(داستن هوفمان) و(هافانا روز ليو)، واتعرض لأول مرة سنة 2025، قبل طرحه تجاريا في 2026.
بنتعرف على نيكي (ليو وودال)، شاب موهوب في عزف البيانو، لكن إصابته بحساسية مفرطة تجاه الأصوات بتخليه يفقد فرصته في احتراف العزف، ويشتغل في ضبط آلات البيانو مع أستاذه العجوز هاري (داستن هوفمان)، اللي بيعتبره بمثابة ابنه.
المفارقة إن نيكي بيكتشف بالصدفة إن قدرته الاستثنائية على السمع بتسمح له بفتح الخزائن الحديدية من غير معرفة أرقامها السرية، وده بيخليه محل اهتمام مجموعة من المجرمين، اللي بيعرضوا عليه الاشتراك معاهم في عمليات سرقة مقابل مبالغ مالية ضخمة.
ومع تعرض هاري لأزمة صحية، بيلاقي نيكي نفسه مضطر يدخل العالم ده، في نفس الوقت اللي بيبدأ فيه علاقة عاطفية مع روثي (هافانا روز ليو)، الطالبة الموهوبة في التأليف الموسيقي، واللي بترجع له إحساسه بالعالم اللي كان نفسه ينتمي ليه.
أكتر حاجة عجبتنا في Tuner هي قدرة المخرج على صناعة التشويق من خلال الصوت، مش من المطاردات والمعارك التقليدية. إحنا قدام فيلم بيحول أبسط الأصوات لتفاصيل مهمة في الأحداث، وبيستخدم الموسيقى والصمت بشكل يخلي المشاهد يشارك البطل توتره وتركيزه.
ليو وودال قدم أداء مقنع لشخصية شاب انطوائي، ممزق بين موهبته وماضيه ومستقبله، بينما داستن هوفمان، بحضوره الهادي، قدر يضيف جانب إنساني جميل للحكاية. والمفارقة بين الشاب اللي بيسمع أكتر من اللازم وأستاذه العجوز اللي بيفقد سمعه تدريجيا، واحدة من أجمل أفكار الفيلم.
لكن ده مش معناه إن السيناريو خالي من العيوب. بعض تطورات الأحداث، خصوصا في الثلث الأخير، بتعتمد على المصادفات أكتر من المنطق، وكمان العلاقة العاطفية بين نيكي وروثي كانت محتاجة مساحة أكبر علشان نصدق تأثيرها على قرارات البطل.
في النهاية، Tuner فيلم ذكي وممتع، بيقدم معالجة مختلفة لأفلام الجريمة، وبيعرف يوازن بين التشويق والمشاعر الإنسانية. صحيح مش كل مفاتيح السيناريو مضبوطة بنفس دقة البيانو، لكنه فيلم يستحق المشاهدة، خصوصا لو بتحب الحكايات اللي بتخليك تسأل نفسك: هل الموهبة ممكن تتحول في يوم من الأيام للعنة؟



