مقالات كايرو 360

مراجعة فيلم Backrooms: المكان هو بطل الفيلم الحقيقي

قراءة سهلة

التقييم: 2 من 5

نصيحة كايرو 360: الفيلم بيعتمد على الغموض النفسي والمشاهد غير المُفسرة بالتالي هو في رأينا مش لكل الناس

عجبك شوف: فيلم Skinamarink إنتاج 2022، واللي بيحكي عن طفلين بيكتشفوا اختفاء والدهم وأبواب وشبابيك البيت بشكل غامض. وبيعتمد هو كمان على تحويل الأماكن المألوفة لمصدر رعب.

تخيل تدخل أوضة عادية جدا، وتكتشف إنك مش قادر تخرج منها، والأسوأ إن كل باب بتفتحه بيوصلك لأوضة تانية شبهها، من غير ما تعرف أنت فين أو إزاي ترجع. فكرة بسيطة، لكنها كافية إنها تخلي أي حد يفقد أعصابه. وده بالظبط العالم اللي بياخدنا له فيلم Backrooms، واحد من أغرب أفلام الرعب اللي ظهرت سنة 2026.

الفيلم بيحكي عن كلارك (شيواتال إيجيوفور)، مهندس معماري سابق بيدير معرض أثاث بيعاني من مشاكل مادية، بالتوازي مع أزمة في حياته الزوجية بتدفعه للعلاج النفسي عند الدكتورة ماري (ريناتي رينسف). وفي يوم بيكتشف كلارك مدخل غريب في بدروم المعرض، بيوصله لشبكة ضخمة من الغرف والممرات اللي بتخالف كل قواعد المنطق والهندسة.

الغريب إن كلارك مش بيهرب من المكان، بالعكس، فضوله المعماري بيخليه يحاول يستكشفه ويرسم خريطة له، بل ويستعين بموظفة عنده وصاحبها لتوثيق الاكتشاف بكاميرا فيديو. لكن الأمور بتاخد منحنى مرعب، ولما بيختفي كلارك، بتضطر ماري تدخل العالم الغامض بنفسها علشان تدور عليه.

المخرج (كين بارسونز) كان عنده 20 سنة بس وقت عرض الفيلم، ودي أول تجربة سينمائية طويلة له. والمثير إن الحكاية بدأت سنة 2019 بصورة غامضة انتشرت على الإنترنت، قبل ما يحولها بارسونز لسلسلة فيديوهات على يوتيوب سنة 2022، ومنها وصلت لشركة A24.

أقوى عنصر في الفيلم هو تصميم المكان نفسه. الممرات الصفراء، الإضاءة الصناعية المزعجة، والغرف الفاضية اللي المفروض تكون مألوفة، كلها بتخلق إحساس مستمر بعدم الأمان. والأذكى إن بارسونز بيستغل الصمت وأصوات المكان ولقطات كاميرات الفيديو القديمة علشان يخلينا نخاف من اللي ممكن يكون مستخبي، مش بالضرورة اللي ظاهر قدامنا.

لكن على مستوى السيناريو، محاولة المؤلف (ويل سوديك) ربط المتاهة بالصدمات النفسية للشخصيات مش بنفس قوة التنفيذ البصري. أحيانا بنحس إن الشخصيات موجودة علشان تبرر استكشاف العالم الغريب، أكتر من كونها شخصيات مكتملة نقدر نتعاطف معاها. والغموض اللي بيخدم الفيلم في البداية، ممكن يتحول عند بعض المشاهدين لإحساس بالإحباط مع استمرار الأسئلة من غير إجابات واضحة.

Backrooms في النهاية فيلم قوته الأساسية في الإخراج والتصميم والصوت، أكتر من الحكاية التقليدية. ولو بتحب الرعب

النفسي اللي بيسيب لخيالك مساحة يشتغل فيها، هتلاقي هنا حاجة تستحق الاهتمام. إنما لو مستني تفسير منطقي لكل حاجة، فغالبا هتخرج من المتاهة وعندك أسئلة أكتر من اللي دخلت بيها.

زر الذهاب إلى الأعلى