مقالات موقع Yaoota

الدليل الحصري، لشراء التليفزيون العصري!

قراءة سهلة

على الرغم من أن كل بيت في مصر لازم يكون فيه تليفزيون أو أكتر، إلا أن التطور التكنولوجي جعل الرغبة في تحديث التليفزيونات القديمة ضرورة لابد منها، سواء لاستقبال بث القنوات الحديثة بتقنيات HD المختلفة. أو حتى لتشغيل الأدوات الحديثة زي الفلاشات والهاردات، واللي بيكون عليها الصور الشخصية وملفات الفيديو أو حتى مكتبات كاملة للأفلام.

علشان كده هانقدم لكم في ياقوطه دليل جديد ومتميز لشراء الـ Smart TV، وممكن كمان ترجعوا لموضوع قديم لنا قدمنا فيه بعض النصائح، لكن حسينا انه ممكن يكون متخصص شويتين. فا حبينا نجيب لكم معلومات مختلفة وشرح أكثر تبسيطا.

ليه تشتري تليفزيون جديد؟

زي ما قولنا في مقدمة الموضوع. الدنيا بتتطور طوال الوقت، والتليفزيونات القديمة مش بتقدم نفس نقاء الصورة، خاصة مع انطلاق معظم قنوات الستلايت دلوقت بتقنية الدقة العالية HD. كمان مع تطور الزمن وانتشار التليفونات الذكية، أصبح هناك حاجه لمشاهدة الصور والفيديوهات من الموبايل للتليفزيون مباشرة، وده مش هايحصل غير بوجود تليفزيون حديث.

أما زيتونة الموضوع. بتتمثل في أن التليفزيونات الحديثة ينفع تعرض من خلالها أفلام ومسلسلات من يوتيوب مباشرة، أو حتى تستعملها للدخول على الأنترنت وعرض البرامج المفضلة لك بدون فواصل. يعني بيتفتح أمامك عالم من الترفيه والمتعة بلا حدود.

التليفزيونات الأغلى

وفقا لنتائج البحث على يا قوطه، واللي رتبت لنا التليفزيونات الذكية من الأغلى للأرخص بناء على طلبنا، أغلى تليفزيون في مصر كان من شركة LG، واللي بيوفره موقع جوميا بسعر 57.999 جنيه، من راديو طلعت. لكن لما استطلعنا رأي الزبائن في متاجر البيع، قالولنا إن التليفزيون مش هايكون اختيارهم الأول وقت الشراء، لارتفاع ثمنه طبعا، ولأن الإمكانيات اللي فيه مش على قائمة اولوياتهم أثناء عملية الشراء.

القائمين على البيع في متجر (بى تك) أكدوا لنا إن بعض الموديلات الغالية من التليفزيونات الذكية تقيلة شويه في بيعها، وكتير من الناس بتتفرج عليها من باب التندر على السعر، لكن ده لا يمنع إن بعض المستخدمين بيفضلوا شراء أفضل وأغلى الأنواع خاصة في السلع اللي زى التليفزيون، علشان بيعيش معاهم العمر كله تقريبا.

أراء المشترين.

لكن الأستاذ (طلعت) وهو أحد المشترين اللي سألناه عن رأيه في منتجات LG قال لنا انه واجه تجربة سيئة جدا مع التليفزيون الذكي اللي اشتراه مؤخرا، واللي اكتشف بعد فترة من الاستعمال ارتفاع حرارة الجهاز بشكل غير طبيعي. الأمر اللي أجبره على ارجاع التليفزيون واستبداله، لكنه أشاد بالمعاملة المحترمة وخدمة العملاء السريعة والمهذبة من LG

لكن مدام (ميري) واللي قابلناها وهي بتختار أجهزة كهربائية منها التليفزيون لاقتراب زواج بنتها، قالت لنا انها من فترة طويلة وهي معتمدة بشكل أساسي على الأجهزة الكهربائية من LG سواء كانت تكييف أو مايكرويف أو طبعا التليفزيونات. وأكدت لنا أن الشعار المميز لـLG أصبح بالنسبة لها زي ختم الجودة، بسبب تجاربها السابقة مع كل منتجات LG وخاصة التليفزيونات.

التليفزيون الأرخص

رجعنا تاني لياقوطه وطلبنا المرة دي أرخص تليفزيون في مصر! ونتائج البحث قالت لنا إنه تليفزيون توشيبا 22 بوصة، وبيتباع في بي تك. علشان كده ما كدبناش خبر وروحنا فورا على بي تك، وفعلا لقينا التليفزيون متوفر، وكمان بيشكر البائعين فيه جدا، وبيقولوا إن عليه الطلب نتيجة سعره المميز (1999 جنيه) وإنه من ماركه محترمه زي توشيبا.

وتشاء الصدف إن أ/ مدحت يشتري التليفزيون بالفعل أمامنا، ولما اتكلمنا معاه شويه قال لنا إن السعر هو اللي جذبه لشراء التليفزيون، وإنه محتاج تليفزيون صغير لغرفة النوم، ومش هايلاقي أحسن من توشيبا المشهورة بقوة منتجاتها وضمانها الحقيقي.

أما إبن أ/ مدحت فقال لنا إنه بيفضل التليفزيونات الأحدث والأقوى، علشان يقدر يشغل عليها الهارد ديسك 2 تيرا اللي معاه، واللي بيخزن عليه أفلام كتير بيحملها أونلاين ويتفرج عليها في وقت فراغه. علشان كده هو بيفضل شراء تليفزيون أحدث من LG أو Samsung.

إيه أخبار Samsung؟

وماينفعش نتكلم عن التليفزيونات الذكية بدون ما نتكلم عن التليفزيونات ماركة سامسونج، وتعتبر سامسونج من الشركات الرائدة في مجال صناعة التليفزيونات الذكية، والسوق المصري من أوائل الأسواق اللي استقبلت التليفزيونات الذكية من سامسونج.

رجعنا تاني لـياقوطه علشان نشوف أغلى تليفزيون ذكي ماركة سامسونج في السوق. وياللعجب! وجدنا التليفزيون الأغلى هو سامسونج 65KS9500 بشاشة 65 بوصة ألترا أتش دي 4K وكان بيتباع في بي تك، أما السعر فكان 48999 يعني تقريبا 49 ألف. وهو مبلغ ضخم لكن في المقابل بيضمن تليفزيون مميز ينفع في الأماكن المفتوحة أو الغرف الضخمة، وبيوفر أيضا دقة شاشة متميزة.

أما لو بتدوروا على تليفزيون رخيص من سامسونج، الحل كان من خلال محددات البحث في ياقوطه واللي حددت لنا تليفزيون سامسونج 32 بوصة ال أي دي عالي الدقة، واللي ممكن تشتروه من بي تك مقابل 4199 جنيه. وهو سعر رائع مقارنة بإمكانيات التليفزيون اللي مش ضعيفة جدا.

أما التليفزيون اللي ننصحكم به من سامسونج هو تليفزيون من فئة Series 5 – J5200 واللي ممكن تشتروه مقابل 9999 من بي تك، وهو تليفزيون 48 بوصه يعتبر حجمه متوسط مائل للكبر، بالإضافة لكونه تليفزيون عالي الدقة ال أي دي، يعني هايوفر قدرة ممتازة على عرض الصورة مقارنة بسعرة المتوسط بين أسعار باقي الأجهزة.

وكما لازم نقول أن ياقوطة رشحت لنا تليفزيون 32 بوصه من سامسونج بسعر مناسب هو 4098 جنيه. والسعر ده بتقدمه جوميا، لكن سوق دوت كوم كان عليها بعض تقييمات للتليفزيون جائت كلها إيجابية ومميزة. علشان كده بنرشح لكم التليفزيون ده كمان لو من محبي سامسونج.

أراء المشترين

مكانش ينفع ننهي زيارتنا لقسم سامسونج بدون ما نرجع للسوق مرة تانيه ونشوف أراء البائعين والمشترين على حد سواء.

البائعين في بي تك مدحوا لنا في سامسونج، وقالوا لنا ان الشركة قدرت (تربي زبون) في السوق المصري بسرعة، ومشترين كتير بيسألوا عنها بالإسم. مدام (نهى) قالت لنا ان ابنها اشترى تليفزيون سمارت من سامسونج من حوالي 3 سنين وحتى الأن شغال معاه كويس جدا، وهى النهردة بتشترى تليفزيون جديد من سامسونج لمنزلها، وماعندهاش استعداد تغير ماركة سامسونج بأي ماركة أخرى.

لكن الدكتور سامح قال لنا إنه بعد تجربة (ال جي) وتليفزيوناته الذكية، قرر لا يتعامل مع سامسونج من جديد، واشتكى لنا تحديدا من مستوى نقاء الألوان في أجهزة سامسونج، والذى لا يقارن –من وجهه نظره – بمستواها في أجهزة ال جي اللي قدرت تتفوق على سامسونج في النقطة دي.

توشيبا عامله ايه دلوقت!

أما محبي شركة توشيبا، واللي قدرت تبني جسور طويلة من الثقة مع المستخدم على مدار وقت طويل، توشيبا مش ناسياهم وبتقدم لهم تشكيلة كبيرة من التليفزيونات الذكية. وعلشان تثبت تميزها، معظم موديلات توشيبا مجهزة بأجهزة ستلايت داخلية، بتجنب المستخدمين شراء ريسيفر منفصل، لكن أجهزة توشيبا مش كلها مزايا زي ما كنا متوقعين، وده اللي أكده لنا (حسن) بياع في أحد منافذ بيع (بي تك) لما قال لنا إن مافيش اقبال على التليفزيونات ماركة توشيبا زي زمان، وده بسبب وجود أنواع أكثر حداثه وأكثر تلبية لطلبات المستخدمين زي (ال جي) و (سامسونج).

نفس الرأي وافقت عليه مدام يمنى، واللي أكدت لنا أن عندها غسالة وتكييف وشفاط توشيبا، لكن لو فكرت تشتري تليفزيون ذكي أو لابتوب، هاتشتري من سامسونج أو ال جي.

الأسعار والمواصفات

أما بالنسبة لأسعار ومواصفات الأجهزة، نقدر نقول أن العربي جروب بيوفر أفضل أسعار تليفزيونات توشيبا في السوق، ولما شوفنا رأي (ياقوطة) أكدت لنا الكلام ده بأسعار تتراوح بين 4399 للتليفزيون 32 بوصه ويرتفع السعر الى 11499 مع التليفزيون 55 بوصه، وكل موديلات توشيبا فيها خاصية الريسيفر الداخلي.

بلاش الصيني

لكن الأمر اللي بينصحنا بيه كل البائعين، هو عدم شراء الأجهزة الصينية اللي أصبحت متوفرة في الأسواق خاصة مع ارتفاع أسعار الدولار، واللي دفع كتير من المستخدمين للتفكير في شراء الأجهزة الصينية الأرخص.

لكن أ/ محمد صادق حكى لنا قصة سيئة جدا مع جهاز تليفزيون صيني اشتراه مؤخراً، والنتيجة كانت توقف التليفزيون عن العمل بعد حوالي 3 شهور، وعدم وجود ضمان حقيقي للجهاز. وعلى الرغم من انخفاض ثمن التليفزيون لكن ثمنه كله راح هدر.

ترشيحات ياقوطه

ودلوقت لازم نقول لكم الأنواع والأسعار اللي رشحتها لنا ياقوطه لأحسن أسعار السمارت تي في وافضل الأنواع. ونرشح لكم من القائمة توشيبا 55 بوصة واللي بييجي بريسيفر داخلي وشاشة LED Full HD. أما السعر فكان 11499 من العربي جروب

كمان بنرشح لكم تليفزيون تى سى ال واللي ممكن تشتروه بسعر 14999 من العربي جروب وهو تليفزيون ذكي 55 بوصه واللي بيميزه انه بيشتغل بنظام Android وهايكون من السهل ربطه بأي تليفون ذكي بيشتغل بنظام أندرويد، كمان المميز أن الشاشة Ultra HD يعني النقاء بتاعها متميز.

وللميزانيات المحدودة بنرشح لكم تليفزيون جاك 32 بوصه من سوق دوت كوم بسعر 3499 والشاشة الخاصة بالتليفزيون HD LED والتليفزيون بيشتغل بنظام أندرويد.

أما أخر تليفزيون بنرشحه لكم من قائمة جوميا هو تليفزيون سامسونج 32 انش واللي هتلاقوه في سوق دوت كوم بسعر 4449 والشاشة الخاصة به بتعمل بنظام LED HD.

ده كان استطلاعنا للسوق مؤخرا فيما يتعلق بالأجهزة اللي عليها أكبر نسبة سحب، وتعليقات المشترين والبياعين على حد سواء، ونصائحهم وتجاربهم. ياترى بعد كل ده. أيه قراركم بخصوص الشراء؟!

زر الذهاب إلى الأعلى