ياقوطة هاتجاوبك عن أصعب أسئلة عن البلاي ستيشن!
ممكن تقرا عنوان الموضوع ده وتقول في بالك “وهو أيه يعني ممكن يكون صعب بخصوص شراء جهاز ألعاب” لكن لو جربت ونزلت بنفسك وشوفت تجربة شراء جهاز بلاي ستيشن. هاتعرف أن الموضوع أصعب من شراء مجرد جهاز ألعاب.
أتكلمنا قبل كده عن تجربة شراء بلاي ستيشن 4 في العاصمة ووصلت لنا ردود أفعال جيدة على الموضوع. وحسينا أننا محتاجين نجاوب عن أسئلة أصعب وأدق بخصوص شراء البلاي ستيشن.. جاهزين؟
أشتري بلاي ستيشن ٤ ولا أستنى بلاي ستيشن ٥ ؟
السؤال ده يعتبر واحد من أهم وأصعب الأسئلة اللي ممكن حد يسألها بخصوص بلاي ستيشن. لأنه بيتعلق بالمستقبل.
بلاي ستيشن حددت موعد لإصدار جهاز بلاي ستيشن ٥.وده هايكون في نهاية سنة ٢٠٢٠. يعني الوقت اللي بيفصلنا عن الإعلان عن الجهاز الجديد يعتبر قصير نسبيا.
التطويرات المتوقعة من بلاي ستيشن حسب التسريبات بتقول أن التصميم هايكون أحلى من حيث الشكل عن بلاي ستيشن٤ واحتمال الجهاز ييجي معاه هيدفون من بلاي ستيشن لتجربة صوتيات أفضل أثناء اللعب. وطبعا غني عن القول أن بلاي ستيشن٥ هاييجي مع معالج أقوى وكفاءة رسوميات أعلى ودعم لتقنيات عرض أكبر زي 4K أو أحسن كمان.
لكن زي ما بتيجي الأجهزة الجديدة مع تطويرات أكبر بتيجي مع أسعار أغلى بكتير. علشان كده لو بتخطط لشراء بلاي ستيشن ٥ ننصحك تعمل حسابك في ميزانية جيدة. خاصة أن مع بداية طرح أي جهاز جديد بيكون عليه اقبال كبير فا مش بيتم عمل أي خصومات أو عروض ترويجية.
وعلشان نكون محددين في إجابة السؤال هانقول لك أمتى تشتري بلاي ستيشن٤ وأمتى تستنى بلاي ستيشن ٥
حاجات تخليك تشتري بلاي ستيشن٤
- لو بتدور على أرخص جهاز ألعاب من بلاي ستيشن متاح حاليا.
- لو عاوز تلعب لعبة معينة زي Call Of Duty أو GTA بإصدارات مختلفة بغض النظر قديمة أو حديثة.
- لو مش عاوز تستنى وعاوز جهاز تجيبه بكره وتلعب بيه في نفس اليوم!
- لو بتخاف من المشاكل اللي بتيجي مع الأجهزة اللي لسه مطروحه في السوق جديد وعاوز جهاز متجرب ومضمون.
- لو بتحب تاخد قيمة جيدة مقابل المال
- لو مهتم بخدمة ما بعد البيع في حالة الأعطال والصيانة. الجهاز محفوظ من كل اللي شغالين في التصليح وقطع غياره متوفرة.
حاجات تخليك تشتري بلاي ستيشن٥
- لو بتحب يبقى معاك أحدث أجهزة وما تحتاجش تحدث أجهزتك لوقت طويل.
- لو أنت Gamer محترف وعاوز تشغل أحدث ألعاب بأحدث تقنيات بمجرد إصدارها عالميا.
- لو معاك ميزانية كبيرة وعاوز تخلي نفسك في الأمان
- لو عندك تليفزيون بجودة أعلى من 4K وعاوز تجربة ألعاب مبهرة.
- لو عندك مشروع محتاج يبقى عندك أحدث بلاي ستيشن (يوتيوبر.. محل بلاي ستيشن..الخ)
- لو الجيمز هي أكتر حاجه بتبسطك في الدنيا وممكن تعمل أي حاجه علشان يبقى عندك أحدث تقنية فيها.
لو هاشتري بلاي ستيشن٤.. أشتري أي إصدار؟
لو نويت تشتري بلاي ستيشن٤ يبقى لازم نقول لك شوية نصايح مهمة عرفناهم بعد طول خبرة في المجال ده..
- أشتري نسخة الـ 1 تيرا بايت مش أقل من كده. مع الوقت وتحميل الألعاب وتحديثات النظام. كل دي حاجات بتستهلك مساحة كبيرة من الذاكرة ودايما هاتلاقي نفسك محتاج ذاكرة أكبر.
- أشتري النسخة الـ Slim لأنها الأحدث ولأن شكل الجهاز فيها أحسن واصغر ومش هاياخد مساحة كبيرة. بعض الناس هاتقول لك ان الجهاز بيسخن أسرع مع الوقت وهايبوظ. لكن عن تجربه. الموضوع ده مافيش منه قلق لو المكان اللي بتحط فيه البلاي ستيشن فيه تهوية جيدة.
- أشتري نسخة مناسبة للسوق اللي هاتشتري منه الألعاب. يعني لو هاتشتري ألعاب من متاجر موجودة في مصر والمنطقة العربية يبقى أشتري جهازك من نفس البلد. وخد بالك من كلمة Region اللي بتتكتب على علبة الجهاز من تحت. لازم رقم الـ Region على الجهاز يكون نفس الرقم على الألعاب. وفي مصر والمنطقة العربية الأجهزة والألعاب بتكون Region2 وفي أمريكا Region1 وفي أسيا Region3
- الحالة الوحيدة اللي تشتري فيها بلاي ستيشن مع أسطوانات العاب هي أنك تكون مهووس بإصدار معين للعبة معينة. غير كده هايكون الأفضل تدور على أسطوانات الألعاب بشكل منفرد عن الجهاز علشان تعرف تجيب عروض أفضل.
ولو هاشتري بلاي ستيشن٤… أشتري أمتى؟!
بما أننا داخلين على موسم التخفيضات والبلاك فرايداي (أو الجمعة البيضاء) تقدر تلاقي عروض كويسه لبلاي ستيشن٤. وياقوطة هاتساعدك علشان تلاقي أرخص سعر بلاي ستيشن في مصر لكن لازم نحط في اعتبارنا أن أسعار بلاي ستيشن٤ هاتقل بعد إصدار النسخة الخامسة. يبقى الأفضل نشتري بلاي ستيشن ٤ دلوقت ولا لما يتم اصدار بلاي ستيشن٥ ؟
لو مش قادر تستني وعاوز تدخل علطول في عالم الألعاب يبقى أشتري دلوقت. أما لو عندك القدرة أنك تستني لوقت اصدار بلاي ستيشن٥ هاتقدر توفر مبلغ كويس من الانتظار ده. وهايكون عندك الوقت أنك تقارن بين الإصدارين من حيث المواصفات والسعر وتحدد الأنسب لك على أرض الواقع بدل التكهنات.
أشتريت بلاي ستيشن ٤.. أجيب أسطوانات ولا أحمل ألعاب؟
لو خلاص اشتريت بلاي ستيشن٤ نحب نقول لك – بعد مبروك طبعا- أن قدامك اختيارين علشان تشتري الألعاب.. الأول أنك تشتري أسطوانات والثاني أنك تحملها من متجر بلاي ستيشن.
وعلشان تعرف الأفضل لك عملنا لك جدول يسهل عليك الموضوع خالص.
حاجات تخليك تشتري أسطوانات
- لو مساحة التخزين في الجهاز قليلة.
- لو متاح لك تشتري العاب رخيصة أو تبادل أسطوانات او تشتري العاب مستعملة.
- لو بتخطط تأجر أو تبادل أو تسلف أسطوانات لصحابك وعاوز يبقى عندك مكتبة ألعاب
- لو بتخطط تبيع حسابك على بلاي ستيشن ومش عاوز يبقى عليه العاب.
- لو خايف من سرقة حسابك بالألعاب على بلاي ستيشن
- لو بتحب تستغل الخصومات والعروض على الأسطوانات
حاجات تخليك تحمل ألعابك أونلاين
- لو عندك مساحة تخزين كبيرة في الجهاز.
- لو تقدر تاخد عروض حصرية وأكواد تخفيضات من متاجر بلاي ستيشن
- لو معاك كريدت كارد دولي وعاوز تستعمل الرصيد الموجود فيه
- لو معاك حساب على بلاي ستيشن بلاس.
- لو مش بتحب تبدل أسطوانة كل مرة تعوز تلعب لعبة.
- لو مش عاوز تستهلك قارئ الأسطوانات في الجهاز
هاخد ايه من بلاي ستيشن غير الألعاب؟
كتير منا مش عارفين أن بلاي ستيشن مش بس جهاز ألعاب. ده جهاز ترفيه كامل تقدر تستغل حاجات كتير فيه علشان تنقل تجربة اللعب والمتعة لمستوى أعلى.
- ممكن تشترك في خدمة بلاي ستيشن بلاس. الخدمة دي بتخليك تقدر تلعب كل ألعابك أونلاين مع مستخدمين من كل مكان في العالم – لو الألعاب اللي عندك تسمح بده- وبتديك ألعاب مجانية كل شهر. وكمان بييجي معاها عروض حصرية زي اشتراك ٣ شهور مجانا في نتفليكس لما تشترك في بلاي ستيشن بلاس.
- ولو هاتشترك في بلاي ستيشن بلاس ننصحك تجرب الفترة المجانية اللي بتيجي مع الجهاز. ولو عجبتك ننصحك تشتري الاشتراك السنوي علشان تاخد أعلى نسبة توفير. ولو اشتريت في فترات التخفيضات هاتاخد الاشتراك بسعر أرخص من الوقت العادي.
- بلاي ستيشن تقدر تحمل منه تطبيقات ترفيه تخليك تشوف افلامك ومسلسلاتك وتسمع أغاني براحتك. بلاي ستيشن متاح عليه تطبيقات نتفليكس و Hulu وأنغامي وسبوتفاي وشاهد.نت وغيرها من التطبيقات الترفيهية المتخصصة في الأغاني والأفلام والمسلسلات.
- تقدر تحمل تطبيقات بلاي ستيشن للموبايل. سواء أندرويد أو IOS ومن خلالهم هاتقدر تعمل شات مع صحابك على شبكة بلاي ستيشن بشكل أسرع وأسهل وتقدر تسجل الدخول لحسابك على بلاي ستيشن بشكل سهل وسريع.
- تقدر تحول تليفزيونك من تليفزيون عادي الى سمارت من خلال توصيل فلاشات أو أي حاجه بتشتغل على منفذ USB الموجود في بلاي ستيشن. ومن خلالها تقدر تشغل أي أفلام او مزيكا بسهولة على التليفزيون.
وبكده نكون قدمنا لكم إجابة على مجموعة من الأسئلة المهمة واللي بتحير قطاع كبير من محبي بلاي ستيشن في مصر والمنطقة العربية. لو عندكم أستفسارات تانيه أسألونا في التعليقات أو على صفحات ياقوطة على السوشيال ميديا.

