مقالات موقع Yaoota

مراجعة سماعة AirPods Pro .. الغالي من أبل.. تمنه فيه!

قراءة سهلة

حالة كبيرة من السخرية على السوشيال ميديا صاحبت إطلاق سماعة AirPods Pro الجديدة من أبل. السخرية كانت بسبب سعر السماعة الغالي جدا (٢٥٠ دولار بدون ضريبة أو شحن أو جمارك..الخ) والسبب الثاني هو شكل السماعة اللي شبه سيشوار الشعر. لكن لما وصلتنا السماعة وبدأنا في تجربتها على أرض الواقع.. التجربة أثبتت أن أبل عارفه هي بتعمل ايه وقدمت سماعة من أحسن السماعات في العالم تقريبا.. تعالوا نتعرف أكتر عليها.

طريقة التشغيل والاستعمال

السماعة بتوصل لك في علبة صغيرة نسبيا. لما بتفتحها بتلاقي سلك شحن من نوع Lightning to USB-C بطول جيد و ٣ قطع سيلكون للأذن.. متوسط وكبير وصغير وتقدر تبدلهم بسهولة. وكتالوج الاستعمال من أبل. ثم علبة السماعة نفسها واللي بتحتوي على سماعتين للأذن. والعلبة قابلة للشحن اللاسلكي.

بمجرد فتح العلبة بجوار هاتف أيفون هايظهر لك شكل العلبة والسماعات مع مستوى الشحن في كل سماعة. والسماعات جاهزة للاستخدام ومش محتاجه تتشحن قبل ما تستعملها أول مرة.

بمجرد ما تضغط Connect أو أتصال السماعة هاتتعرف على التليفون وهاتشتغل بدون مشاكل. من بعدها تقدر تتحكم في مستوى الصوت وباقي إمكانيات السماعة من خلال التليفون أو من خلال الضغط على مستشعر صغير في جانب أي سماعة من السماعتين.

لو عاوز تسمع المقطع التالي أضغط على المستشعر مرتين. لو عاوز تسمع المقطع السابق أضغط ٣ مرات. ولو عاوز تغير المود بتاع السماعة اضغط ضغطة واحدة مطولة. السماعة بتيجي مع ٣ أوضاع:

  • الوضع الأول والجديد في السماعة هو وضع عزل الضوضاء أو Noise canslation والوضع ده هايلغي تماما أي ضوضاء ثابتة حواليك (زي صوت التكييف أو موتور العربية أو لو حد مشغل أغنية جنبك بصوت عالي) ولو الضوضاء عالية جدا السماعة هاتقللها لأقل مستوى ممكن.
  • الوضع الثاني هو الوضع الشفاف أو Transparency Mode وده بيسمح بدخول الأصوات من العالم الخارجي لو كنت في مكان زحمه زي تنبيهات المطار أو محطات القطار وكلام الناس وأصوات كلاكسات العربيات علشان لو عاوز ماتكونش معزول عن العالم.
  • الوضع الثالث هو وضع الاغلاق أو Off وده هايخلي السماعة زي أي سماعة تقليدية.

ده الكلام اللي ممكن تعرفه عن AirPods Pro من أي موقع أو فيديو على يوتيوب. لكننا حابين نكلمك عن تجربتنا الشخصية مع السماعة واللي كانت كالتالي:

مراجعة سماعة AirPods Pro من أبل

الشكل والتصميم.. الثبات.. وسهولة الاستخدام

قبل ما نتكلم عن تجربة الاستماع بالسماعة نفسها عاوزين نتكلم عن شكل السماعة نفسه. AirPods Pro تصميمها شيك جدا وعملية جدا.. كمان السماعة أفضل من الجيل العادي AirPods من حيث الشكل. لأنها مش بتيجي مع “ديل” طويل بيخليها شبه الحلق. لكن في AirPods Pro بتيجي مع تصميم صغير ولطيف جدا. ثباتها في الأذن أكثر من ممتاز. وحتى لو حاولت تميل راسك وتحركها بعنف يمين وشمال وفوق وتحت مش هاتقع منك إلا بعد محاولات كتيره جدا جدا. بالتالي السماعة مناسبة لاستعمالها في التمارين الرياضية. خاصة أنها مضادة للعرق ورذاذ المياه. لكن ماتحاولش تغرقها تماما في المياه لأنها مش مقاومة للغمر في المياه.

هل السماعة مناسبة من حيث الثبات لكل المستخدمين؟ الإجابة لا.. شوفنا على النت والسوشيال ميديا ناس بتشتكي من عدم ثبات السماعة في أذنهم بشكل جيد. ومن ملاحظتنا لمئات الشكاوى بخصوص الموضوع ده لقينا أن الناس اللي بتثبت سماعة الـ Airpods العادية في ودنهم مش بتثبت سماعة AirPods Pro في ودنهم كويس! والعكس بالعكس. علشان كده لو كنت بتستعمل سماعة أبل السلكية العادية أو الـ Airpods وبتثبت في ودنك ننصحك تجرب AirPods Pro قبل الشراء علشان تتأكد من النقطة دي.

بالنسبة لسهولة الاستخدام السماعة سهلة جدا في المزامنة مع التليفون – وكمان أجهزة الماك بوك – وباقي منتجات أبل. وبمجرد تعرفها على الجهاز مرة واحدة مش هاتحتاج بعد كده أكتر من إخراجها من العلبة وهي هاتتعرف على أجهزتك لوحدها. لكن لو هاتسمع الصوت من مصدر مختلف هاتحتاج تخلي المصدر الجديد يرتبط بالسماعة الأول. وده صادفنا واحنا بننقل الصوت من الأيفون للماك والعكس. السماعة كمان بتشتغل كويس على أجهزة الأندرويد لكن بدون ميزة التعرف على مستوى شحن البطارية. لكن بعض التطبيقات من جوجل ستور بتقدم الميزة دي.

من الحاجات الغير ظريفة في السماعة أنها بتتطلب تحديث الأيفون لأحدث نسخة من نظام تشغيل التليفون IOS13 فيما فوق. وده هايخلي المستخدمين مجبرين على تحديث نظامهم علشان يستعملوها. لكن لو مش عاوزين تعملوا كده هاتخسروا ميزة التحكم في السماعة من التليفون وهايكون لازم عليكم تتحكموا فيها من خلال الضغط على المستشعر الموجود في جانب السماعة.

حاجه تانيه ضايقتنا.. السماعة بتيجي مع مدخل شحن Lightning to USB-C وده معناه أنكم علشان تشحنوا السماعة لازم تشحنوها من جهاز ماك فيه نفس المدخل أو باستخدام الشاحن اللاسلكي وده مش بيكون متاح عند كل الناس. لكننا قدرنا نتجاوز المشكلة دي بشحن السماعة بنفس سلك شحن الأيفون وسيبنا خالص سلك الشحن اللي بييجي من أبل.

بالنسبة لعلبة الشحن اللي بتيجي مع AirPods Pro شكلها جميل وبتدخل الجيب بسهولة. لكنها سهلة الخدش علشان كده اشترينا حافظة مطاطية تحمي العلبة وما كلفتناش كتير (حوالي ٧ دولار). واشتريناها باللون الأسود علشان نعوض عدم توفير أبل لسماعة باللون الأسود ودي برضو من الأمور اللي مش عاجبانا بخصوص توافر الألوان.

الاستخدام اليومي لـ AirPods Pro

أهم حاجه كنا محتاجين نجربها بخصوص AirPods Pro هي تقنية عزل الضوضاء أو Noise canslation وهي الميزة الأهم اللي روجت لها أبل في كل الفيديوهات الدعائية عن السماعة. علشان كده كان لازم نضع AirPods Pro في اختبار حقيقي وصعب… محطة مصر!

زورنا محطة مصر في وقت الزروة. وأتحركنا في منطقة رمسيس أثناء تشغيل وضع Transparency Mode اللي بيسمح بتوصيل أصوات العالم الخارجي علشان نسمع صوت كلاكسات العربيات وكلام الناس حوالينا. وبما أننا لسه على قيد الحياة ده معناه أن التقنية اشتغلت كويس وإلا مكانش زماننا بنكتب الكلام ده لكم! الحقيقة أن AirPods Pro قدرت تعزل الضوضاء الغير مفيدة وتدخل لنا أصوات العربيات حوالينا والكلام القريب مننا بكفاءة عالية جدا لدرجة أننا عبرنا الطريق ودخلنا المحطة بدون الحاجة لخلع السماعات وبدون ما تحصل مشاكل.

لكن اللي لاحظناه أن السماعة مش بتدخل لنا الصوت كويس لو حد جنبنا بيتكلم معانا. في الحالة دي هاتضطر تقلل الصوت أو تشيل السماعة من ودنك. واللطيف هنا أن أبل أضافت خاصية تخلي السماعة توقف الموسيقى لو شيلت واحدة من السماعات بشكل أتوماتيكي علشان تقدر تسمع أفضل. وترجع الموسيقى تشتغل تاني لو حطيت السماعة. والأوبشن ده ممكن تقفله أو تشغله من إعدادات السماعة.

داخل المحطة نفسها ومع تشغيل Transparency Mode قدرنا نسمع التنبيهات في المحطة والنداء على القطارات بسهولة. لكن مع تشغيل نمط عزل الضوضاء أو Noise canslation الأصوات حوالينا قلت بشكل كبير جدا جدا – ما اختفتش تماما – لكن قدرنا نركز مع الموسيقى بشكل رائع بالتناسب مع عدد الناس والأصوات العالية. لكن لازم تاخدوا بالكم من أن خاصية Noise canslation هاتخليكم مش سامعين الأصوات حواليكم بنسبة ٩٠٪ تقريبا. بالتالي ده ممكن يشكل خطورة لو في الشارع أو في مكان زحمة. ونقترح عليكم تشغلوا الخاصية دي لو متأكدين من أن ظروف المكان حواليكم تساعد على ده.

من الحاجات اللي ضايقتنا في AirPods Pro أنه ماينفعش نتحكم في ارتفاع وانخفاض الصوت من السماعة نفسها. ولازم ده يحصل من خلال التليفون نفسه أو من خلال المساعد الصوتي Siri ودي حاجه مش عملية علشان ناس كتير بتشعر بالإحراج أنها تكلم سيري بصوت عالي خاصة في الأماكن العامة!

جودة الصوت والميكروفون

جينا لأهم نقطة في استعمال AirPods Pro ألا وهو الغرض الأساسي من استعمال السماعة! جودة الصوت والميكروفون.

استعملنا السماعة بشكل مكثف في سماع كل أنواع الموسيقى اللي ممكن تتخيلوها. والنتيجة كل مرة كانت أكتر من مبهرة. ومافيش ولا مرة حسينا أننا عاوزين نرفع الصوت لأعلى درجة ممكنة لأن جودة الصوت كانت مبهرة دايما ومهما ارتفع الصوت بتفضل الجودة ممتازة. كمان في الاستماع للأصوات الغير موسيقية زي الكتب الصوتية أو مقاطع الفيديو أو القرأن الكريم. كل ده بنقاء صوت أكثر من رائع.

أما بخصوص المايك. ولا مرة عملنا مكالمة صوتية وجائت لنا شكوى بخصوص جودة الصوت. بالعكس في بعض المكالمات كانت جودة الميكروفون أفضل في توصيل الصوت من ميكروفون الأيفون التقليدي. كمان السماعة بتسمح لك تتحرك لمسافة كبيرة بعيد عن التليفون (حوالي ٥٠ متر) بدون فقدان الاتصال مع التليفون.

كمان المزامنة بين الصوت والفيديو كانت رائعة. وقدرنا نتفرج على ملفات أفلام ومقاطع يوتيوب بمزامنة مدهشة بين الصوت والصورة وبدون أي فواصل بين الصوت والصورة. وده كان رائع بالمقارنة بحجم السماعة الصغير اللي أعطانا شعور في البداية أن الصوت مش هايبقى كويس لبُعد الميكروفون عن الفم. وبالمقارنة بعدد كبير من السماعات اللاسلكية اللي بتيجي من شركات صينية.

سرعة الشحن وسهولة التوصيل ومميزات اضافية

تجربتنا مع AirPods Pro فيما يتعلق بالشحن كانت ممتازة. السماعة بتوصل لمعدل شحن كبير جدا في وقت قليل. كل ده واحنا بنشحنها من خلال التوصيل بمنفذ USB مع جهاز ماك بوك. وما حسيناش اننا محتاجين نوصلها بالكهرباء مباشرة لكن لو عملنا كده هناخد سرعة أكبر في الشحن.

أبل كمان أضافت ميزة لطيفة: لو وضعت السماعات في العلبة لمدة ٥ دقائق فقط هاتحصل على ساعة كاملة من الاستماع. ودي ميزة ممتازة لو مستعجل علشان تسمع الموسيقى ومش عاوز تستنى كتير على الشحن. كمان بعض المستخدمين بتستعمل سماعة واحدة فقط وتترك التانيه في علبة الشحن ثم تستعمل القطعة المشحونة لحد ما يتم شحن الثانية وهكذا.. ودي حيلة لطيفة لمضاعفة الفايدة من السماعة لو كنت قادر تستغنى عن السماعة الثانية.

لكن بما أننا بنتكلم عن الشحن لازم نفهم أن بطارية السماعة غير قابلة للإزالة. وتغييرها لازم يتم من خلال أبل نفسها. وأسعار الصيانة في أبل غالية مقارنة بمراكز الصيانة الغير معتمدة. بالتالي المستخدمين ها يعانوا لما يعوزوا يغيروا البطارية ودي حاجه لازم هاتحصل مع كثرة استخدام السماعة خاصة بشكل يومي. بالتالي دي نقطة مهمة لازم يتم وضعها في الحسبان قبل شراء السماعة.

من المميزات الإضافية اللي بتيجي مع AirPods Pro أنك لو ضيعت سماعة واحدة أو السماعتين تقدر تعرف مكانها باستخدام تطبيق Find My اللي بييجي مع الأيفون. وتقدر تشغل صوت من السماعة من خلال التطبيق علشان توصل لها بشكل أفضل لو مش عارف هي فين بالظبط.

أبل أضافت كمان لمبة إضاءة صغيرة في علبة السماعة الإضافية تقدر تعرف منها معدل شحن السماعة بسهولة من خلال إضائتها.

وأخيرا.. السماعة ممكن تتعرض للإتساخ بعد الاستخدام لفترة قصيرة نسبيا لكن تنظيفها سهل سواء كان تنظيف السماعات نفسها أو تنظيف العلبة. باستخدام أي قطعة قماش غير وبرية وبدون استخدام أي منظفات إضافية أو كحول.

السعر

ولأن أبل مش بتقدم أجهزتها بأسعار رخيصة. سعر AirPods Pro غالي جدا من وجهة نظرنا. وسعرها الرسمي هو ٢٥٠ دولار أمريكي بتزيد لحوالي ٢٧٠ دولار بالضريبة. وطبعا السعر بيزيد في مصر مع تكاليف الشحن والجمارك وأرباح التجار.

ومع كل المميزات اللي بتيجي بيها السماعة لسه حاسين أن السعر يعتبر غالي جدا. ولو كانت أرخص بحوالي ١٠٠ دولار كانت هاتكون ممتازة. ولو أرخص بـ ٥٠ دولار كان ممكن نقول عليها قيمة عادلة مقابل الإمكانيات. لكن دايما أبل بتقدم منتجات بأسعار مش متناسبة مع الإمكانيات.

تقييم نهائي

خلاصة الكلام.. سماعة AirPods Pro مش أفضل سماعة من حيث التصميم أو جودة الصوت أو قوة العزل مقارنة بالسماعات المتخصصة في الحاجات دي. لكنها السماعة الوحيدة اللي بتقدم كل المميزات دي مع بعضها في منتج واحد. بينما باقي السماعات في السوق بتقدم ميزة واحدة فقط وبتخسر في باقي المميزات (عزل جيد مع حجم كبير… حجم جيد مع عزل ضعيف.. حجم وعزل جيد لكن جودة ميكروفون ضعيف …الخ)

AirPods Pro سهلة الاستخدام.. عملية وسريعة.. بتقدم المطلوب منها وزيادة.. خاصة لمستخدمي الإيكو سيستم من أبل. لكن كل ده بييجي مع سعر عالي ممكن مايخليهاش الاختيار الأول للمستخدمين. خاصة أصحاب السمارت فون الشغال بنظام الأندرويد.

زر الذهاب إلى الأعلى