Arsenal : ممكن تعمل ايه علشان أخوك؟!

إيه ممكن يكون أقوي من رابطة الأخوة؟ أخوك هو الإنسان اللي هايقف جنبك ويساعدك وينقذك من أي مشكلة تقع فيها، بدون ما يحاكمك أو يصدر عليك الأحكام.. لكن هل تقدر ترد لأخوك الجميل لو هو وقع في مشكلة؟

فيلم Arsenal من إخراج  ستيفن سي ميلر وتأليف جايسون موزبرج ومن بطولة جوناثان سكاتش و أدريان جرينير.

الفيلم بيحكي عن جيه بي اللي بيشتغل مدير ناجح لأحد شركات المقاولات، لكنه بيضطر يترك حياته الهادئة والأمنة علشان ينقذ شقيقه ميكي اللي بيقوم بدوره جوناثان سكاتش.. جوناثان بيتعرض للإختطاف من مجرم لا يعرف الرحمة، بيقوم بدوره المخضرم نيكولاس كيدج.

على الرغم من قوة القصة، إلا أن سيناريو الفيلم اصابنا بالملل والتشويش، نتيجة التطويل في محاولة وصول جيه بي لشقيقه، وعدم وجود الإثارة الكاملة اللي كنا نتوقعها في الأحداث. لكننا نلقي الفشل ده على عاتق السيناريو اللي كان يستحق يكون أسرع وأكثر إثارة وأكثر بعدا عن الملل.

مستوي الموسيقي التصويرية والديكورات كان ضعيف جدا، كمان الإضاءة وحركة الكاميرا كانت ضعيفة وغير مقنعة، وللأسف تركت عندنا شعور أن الفيلم كله تم تنفيذه بمزيج من الإهمال والأستسهال والرغبة في الدفع بالفيلم للسوق السينمائي بسرعة واستهتار.

فيلم Arsenal من نوعية الأفلام اللي مش بنلاقي كلام كتير ممكن نقوله عنه، يمكن لأن كل شيء واضح في الفيلم، والمستوي الفني للفيلم إجمالا كان ضعيف وكان محتاج يكون أفضل من كده.

فيلم Arsenal فيلم مناسب للمشاهدين اللي عاوزين يضيعوا حوالي ساعتين من وقتهم في مشاهدة عمل سينمائي متوسط لم يقدم لنا الإشباع المناسب لا على صعيد التمثيل أو القصة أو السيناريو أو حتي علي مستوي الصورة والفيلم إجمالا!

علشان تبقي عارف:

حقق الفيلم في مصر إيرادات حوالي 45 الف جنيه إيرادات.