مقالات موقع Yaoota

دليل اختيار الرسيفر المناسب

قراءة سهلة

بالنسبة لبعض المشترين بتكون اختيار الأجهزة الإلكترونية بالنسبة لهم عملية بتحصل بالبركة وبدون دراسة سابقة للمنتجات وللسوق اللي بيبيعها، وده للأسف ممكن يوقعهم في كتير من المشكلات ويعرضهم لكتير من التجارب الغير جيدة على الإطلاق.

أما النوع التاني من المشترين وهو الناس اللي بتدور على الأفضل والأكثر مناسبة لهم، وبتدرس السوق والمنتجات الموجوده فيه كويس قبل ما تاخد قرار الشراء، وهم دول الشريحة اللي بنشجعها ونتمنى الجميع يكون منها.

لكن المشكلة الأساسية اللي ممكن تواجه الناس دي هي توافر كمية كبيرة من المعلومات والاختيارات بشكل بيخليهم أحيانا عاجزين عن تحديد الخيار الأفضل بالنسبة لهم. خاصة في سوق مفتوح زي سوق الرسيفرات في مصر واللي بنشوف فيه عدد ضخم من الأجهزة المطروحة، ومن شركات وأسواق مختلفة، بالإضافة لنصائح كتير من الناس اللي بتعتمد على الإفتاء وعدم الفهم. واللي في النهاية بتؤدي لقرار شراء غير صحيح.

ومن خلال موضوعنا هانشرح للناس الطريقة المثالية لشراء الرسيفر المناسب. وهانستعرض أهم المصطلحات اللي بتقابل الناس اللي بتبحث عن الرسيفرات. وفى النهاية هانشوف ايه الأنواع المطروحة في السوق وأسعارها وتقييم المستخدمين لها.

الأنواع الرئيسية للرسيفرات

في البداية لازم نعرف أن الرسيفرات بتنقسم لأنواع مختلفة ورئيسية هي:

  1. الرسيفرات المجانية Free To Air receiver

والمقصود بيها الرسيفرات اللي بتلتقط القنوات التليفزيونية والمحطات الاذاعية المجانية المتاحة للجميع. بدون القدرة على التقاط القنوات المشفرة أو اللي لها اشتراك خاص. وهى أكتر أنواع الرسيفرات انتشاراً.

  1. الرسيفرات المشفرة أو المحمية

وهى الرسيفرات المخصصة لالتقاط بث القنوات المشفرة أو اللي بيستلزم دفع اشتراك لمشاهدتها زي مجموعة ART أو Bein على سبيل المثال. وفى الغالب الأجهزة دي بيتم استلامها مع باقات الاشتراك في القنوات المشفرة.

  1. أجهزة العرض والتسجيل PVR

وهي أجهزة خاصة مهمتها مش مجرد عرض القنوات، لكن أيضا التسجيل منها واستخدام خاصية Time Machine اللي بتتيح العودة للبرامج أو أيقاف تشغيلها بعد عرضها بساعات. والنوع ده مش منتشر بشكل كبير في مصر.

  1. الرسيفرات عالية الوضوح

وهى الرسيفرات القادرة على التقاط القنوات الـHD وعرضها. لكنها في المقابل بتحتاج أنها تشتغل على تليفزيونات HD وإلا الصور مش هاتظهر على الشاشة.

  1. الرسيفرات العادية

وهى رسيفرات عادية وغير مجهزة لالتقاط بث القنوات الـHD، وأصبح وجودها حاليا محدود شوية بعد انتشار تليفزيونات الـHD وزيادة عدد القنوات اللي بتبث محتوياتها بجودة عالية.

مصطلحات الرسيفرات

ولازم قبل ما نتكلم عن أنواع الرسيفرات الموجودة في الأسواق، نتعلم مع بعض المصطلحات اللي ممكن نشوفها أثناء البحث عن الرسيفر المناسب. علشان نقدر نقيم الرسيفر صح بناء على المصطلحات دي.

المصطلح

الوصف

HD/SD/Full HD

المقصود به جودة الصورة اللي بيعرضها الرسيفر. HD معناها High Definition والمقصود بها جودة صورة عالية. أما Full HD فجودة صورة أعلى، أما SD فمقصود بها جودة صورة عادية وغير عالية. ولازم التليفزيون اللي نشغل عليه رسيفر HD أو Full HD يكون قادر على عرض النوع ده من البث.

USB Port

والمقصود بيها أن الرسيفر يكون مزود بفتحة لتركيب أجهزة تانية زي الهارد ديسك أو الفلاش ميموري لعرض البرامج والأفلام المسجلة عليهم. أو لتسجيل البرامج عليهم أو حتى لعمل صيانة للأجهزة.

EPG

وده اختصار Electronic program guide وهى قائمة البرامج ومواعيدها اللي بتقدمها بعض القنوات الفضائية، واذا كان الأوبشن ده موجود في الرسيفر يعني ينفع يتابع المستخدم قائمة البرامج اللي هايتم عرضها أو يعمل Alarm لمتابعة برامجه المفضلة أو حتى تسجيلها.

Fav

وهو اختصار Favorite والمقصود به قدرة الرسيفر على اتاحة الفرصة للمستخدمين تخزين القنوات حسب رغبتهم الشخصية في قوائم شخصية.

TV Apps

والمقصود بها اتاحة الرسيفر تشغيل تطبيقات معينة على التليفزيون زي اليوتيوب و Flicker أو Facebook وغيرها من التطبيقات.

Time Machine/Time Shift

والمقصود بيها إمكانية تسجيل البرامج أثناء عرضها، وبالتالي قدرة المستخدم انه يوقف البث المباشر ويرجع يتفرج على اللي فاته بعد شويه.

Auto Search

خدمة البحث الأتوماتيكي عن القنوات. واللي بتوفر كتير من الوقت والجهد.

IP TV

اختصار Internet Protocole Television وهى تقنية

أسئلة قبل الشراء

وقبل ما نعرف الأسعار والأنواع، محتاجين نحدد احتياجنا للرسيفر المناسب. وده مش هايحصل بدون طرح الأسئلة المناسبة. والأسئلة هي:

  1. هل التليفزيون عندي HD أم لا؟

والإجابة عن السؤال ده هاتحدد نوع الرسيفر اللي هانقوم بشراؤه.

  1. هل أنا من مستمعي الراديو أم لا؟

علشان بعض الرسيفرات بتلتقط بث الراديو وبعضها لا.

  1. هل أحتاج لتسجيل بث التليفزيون؟

علشان نحدد هل هانشتري رسيفر بيسجل أم لا.

  1. هل أحتاج رسيفر متصل بالإنترنت؟

علشان بعض الرسيفرات بتتصل بالإنترنت وبتشغل بعض التطبيقات زي يوتيوب مثلا.

  1. هل أنا مهتم بمشاهدة القنوات المشفرة؟

علشان بعض الرسيفرات بيقدم خدمة فك القنوات المشفرة.

  1. ما هي ميزانية شراء الرسيفر؟

علشان الميزانية واحدة من أهم عوامل تحديد نوع الرسيفر اللي هانقوم بشراؤه.

الأنواع المتاحة من الرسيفرات.

ودلوقت جه الوقت علشان نستعين بياقوطه علشان نعرف الرسيفرات المتاحة في السوق المصري عبر الإنترنت. وياقوطه قالت لنا عن بعض الأنواع المهمة تعالوا نستعرضها مع بعض.

رسيفرات ترومان.

تعتبر من أشهر وأحسن ماركات الرسيفرات في الأسواق العربية والمصرية. وشركة ترومان مش بس شركة بتقدم رسيفرات، لكنها بتقدم أيضا أجهزة تليفزيون ومراوح وشفاطات وأنظمة حماية ومراقبة وغيرها من الأجهزة الإلكترونية، لكن يمكن أنها مشهورة بشكل أكبر في مجال الرسيفرات.

بتقدم ترومان رسيفرات في 3 فئات.

الأولى: فئة رسيفرات SD للتليفزيونات اللي لا تدعم الجودة العالية HD وبتقدم في الفئة دي سلسلة رسيفرات S وهى عبارة عن S1 و S2 و S3 و S4 وسلسلة TM اللي بتقدم تحتها موديلات TM777 و TM888و TM999

وكل فئات الـSD اللي بتقدمها ترومان بتتشابه في امكانياتها اللي مش كبيرة. يعني كل اللي بتقدمه ميزة البحث التلقائي عن القنوات. ثم عرضها على أي نوع من التليفزيونات من خلال وصلة Audio Video اللي بتيجي مع الجهاز.

وبشكل عام رسيفرات SD مش منتشرة حاليا بشكل كبير مع انتشار تليفزيونات HD.

الثانية: فئة رسيفرات HD ودي فيها عدد كبير من الأجهزة، لكنها في النهاية بتتشابه هي كمان في الإمكانيات. وبتقدر الأجهزة دي أنها:

  • تعرض الصورة بوضوح كامل Full HD.
  • امكانية العرض والتسجيل عن طريق اليو اس بى.
  • تسجيل قناة ومشاهدة قناة اخره في نفس الوقت.
  • تقسيم الصورة حتى 16 قناة.
  • البحث الأتوماتيكي للترددات والاقمار Auto Search.
  • قائمه متعددة اللغات Multilanguage menu.
  • حماية أوتوماتيكية ضد التيار المنخفض لمدخل الإشارة.
  • عرض دليل القنوت EPG الإلكتروني باللغة العربية.

ولما لقينا أنواع الرسيفرات في الفئة دي كبيرة، رجعنا الى ياقوطه واللي رشحت لنا TM-808 واللي ممكن نشتريه من سوق دوت كوم بسعر 733 جنيه.

الرسيفر بيخزن حتى 6000 قناة تليفزيونية ومحطة إذاعية، وفيه مدخل USB بيستخدم لتسجيل البرامج المهمة حسب مساحة الفلاش ميموري اللي هايتم وضعها له، بالإضافة لباقي المزايا الموجودة في عائلة ترومان اللي ذكرناها في الأعلى.

أما أفضل أنواع رسيفرات ترومان كبيرة الحجم في رأينا هو رسيفر Truman premier 1 plus واللي عرفنا من ياقوطه انه بيتباع في سوق دوت كوم مقابل 1149 جنيه. وهو سعر مرتفع مقارنة بباقي أنواع رسيفرات ترومان. لكن شهرة (بريميير) وهو الأسم المختصر اللي بيطلقه البياعين على الرسيفر ده من ترومان بتعتبر من أكثر الرسيفرات في مصر شهرة. لكن ايه المميز في الجهاز ده؟

  • الرسيفر بيعمل ببروسيسور من طراز ST وهو من الطرازات القوية.
  • بيدعم عرض القنوات Full HD و 3D.
  • الجهاز مزود بمدخل USB لعمل صيانة للجهاز أو تسجيل البرامج من خلال توصيله بفلاش ميموري أو هارد ديسك. أيضا يمكن تركيب USB HUB لتركيب عدد لا نهائي من الفلاش ميموري.
  • الجهاز بيعرض ملفات المالتيميديا وبيشغل الأفلام الأجنبية بالترجمة.
  • الجهاز موفر للطاقة.
  • ريموت الجهاز يمكن ظبطه بحيث لا تتعارض اشارته مع إشارة التكييف من خلال زرار مخصوص في الريموت.
  • سرعة النقل بين القنوات كبيرة جدا.
  • الجهاز بيدعم كتير من البرامج زي فيس بوك وتويتر ويوتيوب وغيرها.
  • الجهاز بيتصل بالإنترنت من خلال Wifi USB أو من خلال توصيله مباشرة بالراوتر.

أما الفئة الثالثة من الرسيفرات اللي بتقدمها ترومان هي الـ Smart reciver وهى رسيفرات بتمتاز بصغر حجمها وامكانياتها الكبيرة وبتنتج ترومان 6 رسيفرات بالنوعية دي. الفرق الوحيد بينهم في الشكل. لكن كان لازم نرجع لياقوطه علشان نشوف بترشح لنا ايه في الفئة دي.

ورشحت لنا ياقوطه Truman TM-808 HD Mini واللي يعتبر من أفضل الرسيفرات صغيرة الحجم اللي شوفناها في بحثنا. الرسيفر سعره 630 جنيه من سوق دوت كوم. والريسيفر من حيث الإمكانيات مش بيختلف عن باقي الرسيفرات كبيرة الحجم اللي استعرضناها معاكم، لكن كل اللي بيقدمه زياده هو شكله المختلفة وحجمه الصغير اللي ممكن يتم اخفاؤه وراء التليفزيون بحيث يكون منظر المكان أفضل.

هل دي كل حاجه بخصوص رسيفرات ترومان؟ كان ناقصنا حاجه واحده هي أننا نشوف رأي المشترين في الشوارع والمولات الكبيرة بخصوص رسيفرات ترومان.

في البداية سألنا واحد من موزعي ترومان وباقي الرسيفرات واللي أكد لنا أن الموديلات الأقدم من ترومان كانت قوية وقادرة تنافس بشكل قوي في السوق، لكن مع تطور الوقت ودخول المكونات الصينية في المبيعات أصبحت قوة أجهزة ترومان أضعف يوم بعد يوم، ده مكانش رأيه لوحده. كمان الأسطى شعبان محمد المتخصص في تصليح وصيانة أجهزة الرسيفر أكد لنا أن أعطال ترومان زمان كانت قليلة لكن مع الوقت أصبحت أكثر، وده بسبب اختلاف المكونات المصنوع منها الرسيفر مع الوقت والرغبة في المنافسة وطرح أجهزة أكبر بأسعار أرخص.

لكن المشترين كان لهم رأي تاني لما سألنا (كريم) واللي أكد لنا انه بيشتري رسيفر ترومان للتليفزيون الخاص بغرفة النوم واللي اشتراه حديثا، وأكد لنا ان كان عنده 2 رسيفر ترومان قبل كده وأثبتوا كفاءة وقدرة ممتازة على العمل علشان كده هو مش ها يتنازل عن شراء الجديد من ترومان.

أما الأستاذ (رمضان) فقال لنا أن مشكلة ترومان هي الأجهزة الحديثة الصغيرة، واللي بتسخن مع الوقت وكثرة الاستخدام علشان كده بتبوظ بسرعة، أما الأجهزة الأكبر حجما بتقدر تستحمل وتقدم أداء أعلى. علشان كده مهما كان سعرها أغلى هو حريص على شراء الجديد منها دائما.

رسيفرات هيوماكس

وكان لازم نترك محطة ترومان بعد ما تناولنا كل حاجه بخصوصها ونتوقف في محطة جديدة لا تقل أهمية عنها. رسيفرات هيوماكس اللي بيعتبرها كتير من البائعين أهم وأقوى ماركة رسيفرات في الشرق الأوسط. هيوماكس بتتميز باسم قديم ومميز وسمعة طويلة قدرت تحافظ عليها لوقت طويل، لكن بيعيبها أن مافيش أنواع كتير لها موجودة في الأسواق، ناهيك عن ارتفاع أسعارها اللي بيجعل الطلب عليها أقل ومخاطرة المستوردين في استيرادها أكبر.

هيوماكس بتقدم مجموعة من الأجهزة المنوعة مابين الأجهزة المجانية المفتوحة Free To Air أو الأجهزة المشفرة الخاصة بمجموعة قنوات OSN أو حتى قنوات MBC اللي تعاقدت مع هيوماكس على انتاج رسيفرات خاصة بها. بالإضافة لأجهزة العرض والتسجيل كبيرة الحجم. والشكل التالي ممكن يوضح لكم تقسيم الأجهزة اللي بتقدمها هيوماكس وموديلاتها.

المشكلة اللي قابلتنا في استعراض أجهزة هيوماكس هي نقصها الشديد من السوق، وكل ما نسأل أحد التجار علينا يبص لنا بصة غريبة ويقول لنا (هو حد يقدر على أسعار هيوماكس النهرده!) وده اللي استفسرنا منه مع الأسطى مجدي المتخصص في صيانة أطباق الستلايت وأجهزة الرسيفر واللي فهمنا إن استيراد أجهزة هيوماكس قليل جدا في السوق المصري لارتفاع سعرها واقبال المستخدمين على شراء الأنواع الأرخص.

المشكلة دي لم تؤثر فقط على المعروض من هيوماكس، لكنها ضربت عمليات الصيانة وقطع الغيار الخاصة بها في مقتل. لأن أصبحت قطع غيار هيوماكس سواء الداخلية منها أو الخارجية (زي الريموت كنترول مثلا) شحيحة وغير موجودة غير عند بعض التجار الكبار وبأسعار كبيرة.

لكن علشان نلخص لكم مزايا وعيوب أجهزة هيوماكس صممنا لكم الجدول ده اللي تقدروا من خلاله تعرفوا مزايا وعيوب كل موديل من موديلات هيوماكس.

الموديل

المزايا

العيوب

F1 Mini

حجم صغير وتصميم أنيق

مخصص للقنوات المجانية فقط

F1 Free

حجم متوسط وتصميم أنيق

مخصص للقنوات المجانية فقط

Go Box

مخصص لقنوات MBC مع مزايا إضافية في شاهد.نت

لم يطرح في مصر حتى الأن

HD Mini

حجم صغير

بيشغل الفلاش ميموري والهارد ديسك

مخصص للقنوات المجانية فقط

HD1000S

يفتح قنوات OSN

يتطلب أشتراك في قنوات OSN

IR4000HD

يعرض على أكثر من شاشة (موبايل-تليفزيون) في نفس الوقت

نادر الوجود في مصر

سعر غالي

IR4030HD

يعرض على أكثر من شاشة (موبايل-تليفزيون) في نفس الوقت

نادر الوجود في مصر

سعر غالي

I Cord HD+

بيقوم بالتسجيل والعرض في نفس الوقت

مش موجود في مصر

سعر غالي

لكن كل أجهزة هيوماكس بتيجي بمجموعة من المميزات الـ Default اللي ماحبيناش نكتبها في جدول المقارنة علشان ما نكونش بنكرر كلامنا. والمميزات هي:

  • التقاط وعرض كل القنوات المجانية بجودة عالية HD.
  • صوت قوي ومحيط من كل جانب.
  • قوة عالية في الهاردوير بتجنب الجهاز كتير من المشاكل.
  • دعم فني وتحديث السوفتوير بشكل مباشر من خلال الجهاز بدون الحاجة للذهاب للمتخصصين.
  • خاصية EPG الخاصة بمعرفة جدول برامج القنوات لمدة أسبوع كامل.
  • توصيل الرسيفر بالتليفزيون من خلال مخرج HDMI
  • التقاط قنوات التليفزيون واذاعات الراديو على حد سواء
  • قوائم متعددة اللغات: عربي-انجليزي-فرنسي-فارسي

وبعد ما استعرضنا مع بعض الأجهزة اللي بتقدمها هيوماكس، كان لازم نشوف رأي ياقوطة، واللي رشحت لنا New Humax 999 واللي بتبيعه جوميا بسعر 179 جنيه وهو بينتمي لفئة Mini HD Reciver لكن ياترى ايه مميزات وعيوب الجهاز ده؟

نبدأ بالمميزات. الجهاز بيمتاز بحجم صغير وقدرة على العمل لوقت طويل بدون مشاكل. كمان فيه مدخل USB وبيتوصل بالتليفزيون بمدخل HDMI.

أما أهم مميزات الجهاز هي انخفاض ثمنه واللي بنعتبره واحد من أرخص الأجهزة اللي شوفناها خلال بحثنا.

أما عيوب الجهاز فهى انه بيخزن 5000 قناة تليفزيون وراديو. مش 6000 زي معظم باقي الأجهزة، وكمان سمعنا بعض المستخدمين اللي اشتكوا من ارتفاع درجة حرارته بعد وقت طويل من الاستخدام. بالإضافة لأن كل القنوات اللي بيستقبلها الرسيفر هي القنوات المجانية المتاحة للجميع ومش بيستقبل أي قنوات إضافية أو مشفرة.

رسيفرات دريك

وزي ترومان لاقينا شركة دريك مش مجرد شركة بيع رسيفرات، لكنها بتبيع مراوح وشاشات ومكانس وأفران كهربائية. لكن محبي الرسيفرات خاصة الناس القديمة شوية في المجال قالوا لنا شعر في منتجات دريك، وقالوا أنها منتجات مخصصة للعمل ساعات طويلة دون مشاكل، علشان كده بيرشحوا الأجهزة دي لأصحاب الكافيهات أو الأماكن اللي ممكن تشغل الرسيفر والتليفزيون لأوقات تقترب من 24 ساعه!

أ/السيد عطية واللي قال لنا انه بيشتغل في مجال الرسيفرات من زمان جدا، شكر لنا في أجهزة دريك، لكن في نفس الوقت قال لنا الجملة اللي سمعناها كتير أثناء عملنا على الموضوع ده: الأجهزة الحديثة مش بنفس قوة وكفاءة الأجهزة القديمة على الرغم من ارتفاع أسعارها ووعودها للمستخدم بتقنيات حديثة ومبهرة!

على كل حال الصورة دي بتوضح لنا قائمة عائلة رسيفرات دريك بالكامل:

كل الأنواع دي على اختلافها فيها نفس الخصائص اللي في باقي الرسيفرات اللي اتكلمنا عليها. بمعنى أن كلها بتقبل الفلاش ميموري والهارد ديسك، بالإضافة لاستقبالها عدد كبير من القنوات يصل الى 6000 قناة مع خدمة EPG الخاصة ببرامج القنوات. لكن السؤال هو: ايه المختلف في رسيفرات دريك؟!

المختلف هو قدرة رسيفرات دريك على فك تشفير القنوات المشفرة. وعلى الرغم من أننا مش بنشجع على أي نشاط يخالف حقوق الملكية الفكرية، لكن موضوع فك القنوات المشفرة ده فيه كلام. يعني منتشر نظام مشاركة المشاهدة أو اللي بيتسمى في مصر اختصارا (الشيرنج Sharing) أو نظام فك تشفير بعض باقات القنوات من خلال اتصال الرسيفر بالإنترنت. على كل الأحوال رسيفرات دريك فيها إمكانية فك تشفير بعض باقات القنوات. لكن تظل الخدمات دي مشكوك في قانونيتها وفى مدى استمراريتها. يعني مش مضمون أن الرسيفر يقدر يفك الشفرات طوال الوقت. وفى الغالب بيحتاج تحديث للسوفت وير بعد حوالي سنة.

أما عن ترشيحات ياقوطة فيما يتعلق برسيفرات دريك. ياقوطة بتقول لنا أن افضل رسيفر دريك في السوق هو موديل 900 Plus Full HD واللي يمكن شراؤه من سوق دوت كوم مقابل 440 جنيه.

مميزات الجهاز:

  • عرض 5000 قناة تليفزيونية وإذاعية
  • عرض بدرجات وضوح Full HD 1080
  • جدول قوائم البرامج (EPG): حتى 7 أيام
  • لغات عرض متعددة (من ضمنها اللغة العربية)
  • مزود بمخارج HDMI و AV
  • قفل للقنوات (الرقابة الأبوية)
  • خاصية Time Shift اللي بتتيح تسجيل البرامج المفضلة والعودة لها من جديد
  • USB للعرض والتسجيل
  • مشغل وسائط متعددة قوي (فيديو، MP3، وصور)
  • تحديث الجهاز عن طريق ال USB والتحديث الهوائى OTA
  • يدعم الوصول للإنترنت عبرال wifi ( لكن قطعة الواى فاى غير متضمنة مع الجهاز )
  • يدعم الانترنت عن طريق خدمات ال 3G
  • يدعم تطبيقات الانترنت (الطقس،جوجل ..الخ )

عيوب الجهاز

  • فتحات الـ USB خلف الجهاز، الأمر اللي بيخلي توصيل الفلاش ميموري أو الهارد ديسك مش عملى أو سريع.
  • أحيانا ممكن يتعرض الجهاز لبعض السخونة عند تشغيله لفترة طويلة.
  • سرعة النقل بين القنوات بطيئة

موديل تاني من دريك هو 850I HD واللي نقدر نشتريه من سوق دوت كوم مقابل 390 جنيه. تعتبر مميزات الجهاز هي نفسها مميزات الجهاز السابق، لكن بيزيد عليها المرة دي اشتراك لفتح القنوات المشفرة، بالإضافة للحجم الصغير للجهاز.

لكن زي ما بتيجي المميزات بتيجي العيوب. الجهاز لأنه صغير الحجم بيسخن بشكل أسرع من باقي الأجهزة، وممكن يتعرض للتوقف عن العمل لفترة لو اشتغل لوقت طويل بدون راحة. كمان المستخدمين على سوق دوت كوم اشتكوا من عدم وجود مانيوال مع الجهاز لشرح طريقة الاستخدام، ومن صعوبة برمجة الجهاز ومن الصورة اللي لم تكن بالجودة اللي توقعوها.

رسيفرات رويال تك

على الرغم من توقعنا أن رويال تك تكون شركة شغاله في المراوح والغسالات و..الخ زي باقي الشركات اللي استعرضنا الرسيفرات الخاصة بها، لكن في الحقيقة رويال تك متخصصة في الرسيفرات. وفى الأساس رويال تك هي شركة تأسست سنة 2004 وتخصصت في استيراد الرسيفرات، ثم بدأت تفتح لها فروع في القاهرة وباقي المحافظات مع الوقت.

رسيفرات رويال تك مش بتختلف عن باقي الرسيفرات من حيث المزايا والعيوب، لكن بيزيد عليها قدرتها على فتح القنوات المشفرة لمدة أطول وعلى أكتر من سيرفر، كمان الرسيفر بيحتوي في الإصدارات الحديثة منه على فتحات أمامية وخلفية للـ USB لضمان العملية وسهولة الاستخدام.

وياقوطه رشحت لنا الموديل X2Mini المتاح على سوق دوت كوم بمبلغ 599 جنيه ومميزات الرسيفر هي:

  • الجهاز معه 2 ريموت كنترول
  • حساسية عالية لاستقبال الجهاز لإشارة الريموت بالتوجيه من اى اتجاه .
  • الجهاز مدعم بعدد 2 مداخل يو اس بي للعرض والتسجيل
  • سهولة تحديث السوفت وير والقنوات من خلال فلاش ميموري يو اس بي .
  • يمكن تحميل 8000 محطة فضائية وراديو .
  • متعدد اللغات (من بينها العربية والانجليزية)
  • يدعم خاصية EPG
  • يدعم التحكم بالقنوات ( تعديل ، حذف ، نقل ) وعمل قائمة بالقنوات المفضلة .
  • يدعم تشغيل الملفات الصوتية والفيديو بإمتدادات مختلفة ( AVI , DIVX , MP3 , JPG )
  • يدعم تشغيل ال YouTube
  • يدعم خاصية IPTV

عيوب الجهاز

  • السخونة الشديدة بعد التشغيل لوقت طويل
  • أحيانا لا يستجيب للعمل أبداً ويحتاج أعادة تشغيل
  • ضبط بعض الاعدادات وترتيب القنوات صعب

رسيفرات أسترا

ودلوقت جه الوقت نتكلم عن سلسلة رسيفرات أسترا. وهى رسيفرات أثبتت قوة وكفاءة في السوق المصري في الفترة الأخيرة. عم ممدوح عبد الباسط. وهو واحد من أقدم وأشهر الناس الشغالين في صيانة الرسيفرات في مصر، قال لنا أنه بينصح كل زباينه اللي بيسألوه عن أفضل الرسيفرات في الأسواق المصرية أنهم مايبعدوش عن رسيفرات أسترا بحال من الأحوال. لما سألناه عن السبب قال لنا أن أسترا من الشركات اللي لسه محتفظة بقدرتها على تقديم رسيفرات قوية ورخيصة في نفس الوقت.

رسيفرات أسترا الموجودة في مصر مش بتقدم كتير على مستوى الإمكانيات. نفس الإمكانيات الموجودة في باقي الرسيفرات، حتى أن أسترا مش بتقدم إضافات زي فتح القنوات المشفرة وخلافه، لكنها بتركز على الإمكانيات الرئيسية زي جودة الصورة HD و تشغيل الأبليكيشنز الخاصة بيوتيوب وغيرها من الإضافات.

السؤال هو: ياترى ياقوطه بتقول لنا ايه بخصوص رسيفرات أسترا؟ الجدول التالي بيلخص رسيفرات أسترا المتاحة للشراء وفقا لمقترحات ياقوطه.

الموديل

السعر

المميزات

العيوب

HD Max 10500

447 من بي تك

EGP

جودة قنوات HD

قوائم متعددة اللغات

قوائم مفضلة للقنوات

سهولة في التركيب والتعامل

سعر رخيص

لا يوجد تحديث تلقائي للنظام

لا يفتح القنوات المشفرة

حجم كبير نسبيا

Max 9900

845 من موبايل شوب

EGP

جودة قنوات HD

قوائم متعددة اللغات

قوائم مفضلة للقنوات

سهولة في التركيب والتعامل

الدخول على الانترنت WI-FI

تطبيقات الإنترنت مثل يوتيوب

سعر عالي

حجم كبير بعض الشىء

الريموت لا يستجيب بسهولة

HD Max9000

745 من بي تك

EGP

جودة قنوات HD

قوائم متعددة اللغات

قوائم مفضلة للقنوات

سهولة في التركيب والتعامل

حجم صغير نسبيا

قد يسخن عند الاستخدام لوقت طويل

الانتقال بين القنوات بطىء

رسيفرات الهرشمان والكيو ماكس.

ودلوقت لازم نتكلم عن رسيفرات جربناها بنفسنا لكن للأسف كانت تجربتنا معاها سيئة جدا. علشان كده بننصح بعدم شرائها.

النوع الأول هو رسيفر كيوماكس. والحقيقة أن الكيوماكس واحد من أكثر الرسيفرات انتشارا في مصر، وبيستورده في مصر (عبد العال) وهو واحد من أشهر مستوردي الرسيفرات في مصر ومتخصص في استيراد الكيوماكس بالمقام الأول.

الكيوماكس يعتبر تقليد للهيوماكس. وزي أي حاجه تقليد كفاءة الجهاز سيئة جدا وبيتعرض لكتير من الأعطال طوال الوقت. كمان سرعة التغيير بين القنوات بطئية. أما السوفت وير فحدث ولا حرج. السوفت وير ضعيف وناقصه حاجات كتير. وقائمة القنوات المفضلة Favorite Channels بتحتاج لاعادة ضبط طوال الوقت. يعني باختصار تجربتنا مع كيوماكس كانت سيئة جدا.

أما رسيفرات هرشمان كانت بنفس سوء كيوماكس للأسف. وزاد عليها توقف الجهاز عن العمل بعد فترة قصيرة، بالإضافة لسخونة الجهاز بعد وقت طويل من التشغيل. الأمر اللي بيعتبر عيب أساسي في الجهاز.

محمد عبد الله المتخصص في تصليح أجهزة الرسيفرات بيقول لنا عن كيوماكس وهرشمان انهم كانوا من أقوى الأجهزة وأرخصهم في الماضي، وكان عبد العال بيهتم باستيراد أفضل الأجهزة من الخارج وإعادة بيعها، لكن مع الوقت وعزو السوق بالأجهزة الصينية الغير قوية. اتغيرت الحال وأصبحت رسيفرات هيوماكس غير مرحب بيها في السوق، إلا للناس اللي عاوزه رسيفرات بسيطة تقوم بأعمال بسيطة وتشتغل لأوقات قصيرة لتجنب ارتفاع حرارة الأجهزة.

زر الذهاب إلى الأعلى