ازاي تحمي نفسك في الشراء الأونلاين والتقليدي
بفضل انتشار وسائل التواصل الأجتماعي زي فيس بوك وتويتر وغيرها من الوسائل التواصل بين الأشخاص من خلال الأنترنت، أصبحنا بنعرف كتير من القصص وبننفتح على كتير من الأحداث وبنعرف أخبار كتير بمجرد حدوثها.
ومؤخرا تداولت مجموعة من القصص عن استهداف الشباب على مواقع البيع والشراء أونلاين بغرض سرقتهم، وأحيانا بيوصل الأمر للقتل. من خلال إعلانات مزيفة بتستدرج الضحية علشان يتم سرقته والاستيلاء على الفلوس اللي معاه أو الحاجه اللي ناوي يبيعها.
بتتزامن الأخبار دي مع اخبار تانية عن عصابات سرقة بيانات الكريدت كارد ووسائل الشراء أونلاين، واستخدامها اما لسحب أموال من ماكينات الصرف أو في شراء سلع وخدمات أونلاين بطرق غير مشروعة. ومن الواضح أنه مع تطور أساليب المعاملات التجارية بتتطور معاها أساليب النصب والاحتيال والسرقة.
وعلشان احنا في ياقوطة تهمنا مصلحتكم، جمعنا لكم في الموضوع ده مجموعة من الملاحظات والنصائح المهمة، علشان تأمنوا نفسكم سواء لو هاتقابلوا البائع وجها لوجه أو في حالة الشراء أونلاين. علشان توصلوا لأعلى درجة ممكنة من الأمان وضمان عدم تعرضكم لأي أذى.
أولا: تأمين نفسكم في الشراء أونلاين
مع انتشار وسائل التسوق الحديثة، كان لازم تواكبها وسائل دفع حديثة أيضاً، وده اللي حصل مع ظهور كروت الدفع من خلال الأنترنت، واللي بتعطي القدرة للمستخدم أنه يشترى أي سلعة هو عاوزها من أي موقع على الأنترنت من خلال انتقال الفلوس من حسابه لحساب البائع بدون الحاجة للمقابلة الشخصية أو تبادل السلع مقابل الأموال.
وقبل ما نتكلم عن تأمين أنفسكم في عمليات الشراء أونلاين عاوزين نتكلم معاكم بسرعة عن أنواع كروت الشراء علشان نعرف ها نأمن نفسنا ازاي.
- الكارت المدفوع مقدما Prepaid Cards
وهو نوع من كروت الشراء بتصدره البنوك لعملائها ومش لازم يكون مربوط بحساب دائم، بمعنى أن المستخدم بيودع مبلغ معين من المال بحدود معينة بيحددها كل بنك، ويبدأ يستخدم المبالغ دي في عمليات البيع والشراء أونلاين، ولما يخلص رصيده يتجه مرة تانية للبنك ويجدد رصيد البطاقة.. وهكذا.
مميزات الكارت ده أنه في حالة سرقته مش بيفقد المستخدم جزء كبير من المال، لأن البطاقة مش مربوطه بشكل مباشر بحسابه البنكي بالتالي مافيش مخاطر كبيرة، كمان من مميزاته أنه مش بيحتاج إجراءات كتيرة في عمليات اصدار البطاقة وشحنها.
أما عيوب النظام ده فا بتتمثل في أنه مش بينفع في حالات الطوارئ اللي الشخص بيحتاج يشتري حاجه بسرعة، لأنه بيكون مربوط دايما بالرصيد الموجود في البطاقة، كمان البطاقة مش بتكون مقبولة في كل البنوك.
- كارت الخصم المباشر Debit Card
وده بيكون مربوط بالحساب البنكي الرئيسي، ويمكن السحب منه بحدود المبلغ الموجود في حسابك في البنك، وده أخطر نوع من أنواع كروت الخصم لأنه بسرقته أو تسريب بياناته ممكن للص أنه يسحب رصيدك بالكامل أو جزء كبير منه في وقت قصير. بالتالي لازم نلتزم بأقصى درجات الحذر اثناء استخدامه.
- كارت الائتمان Credit Card
وده كارت بيقدم البنك من خلاله سلفة بضمان الحساب البنكي للعميل يستخدم منها المبلغ اللي يحتاجه ويسدد المبلغ اللي عليه في أخر الشهر، أو لفترة أطول مقابل تحصيل فوائد من العميل، ونقدر نقول أن مستوى المهاطرة في استخدام الكارت ده متوسطة، ومرتبطة بالمبلغ اللي اتفق العميل مع إدارة البنك على التعامل عليه على البطاقة.
ونقدر نقسم أنواع الكروت الائتمانية من حيث الخطورة باختصار في الجدول التالي:
|
نوع الكارت |
مستوى الخطورة |
المميزات |
العيوب |
|
مدفوع مقدما Prepaid |
قليل |
|
|
|
كارت خصم Debit |
عالي |
|
|
|
ائتمان Credit |
متوسط |
|
|
ازاي تأمن نفسك في التعامل أونلاين؟
- اشتري من مواقع موثوقة وليها مصداقية، وممكن تستعين بمحرك البحث من ياقوطة واللي مش بيقدم لك مقترحات غير من مواقع موثوقة وقوية.
- ركز في تفاصيل ومواصفات الجهاز أو السلعة اللي بتشتريها أونلاين علشان معظم أخطاء الناس اللي بتشتري أونلاين بتكون أنهم اشتروا سلعة مش عاوزينها أو اشتركوا في عرض مش عارفين كامل مميزاته.
- استعمل بطاقة من البنك تكون مسبقة الدفع، وتشحنها بمبالغ بقدر المعاملة اللي هاتقوم بيها أو بمبلغ أعلى منها بشكل قليل، علشان تضمن في حالة السرقة أو الضياع انك مش هاتفقد مبلغ كبير من المال.
- لما تعمل أسم مستخدم وكلمة سر في الموقع اللي هاتشتري منه حاول تخلي كلمة السر صعبة الاستنتاج ومكونة من حروف وأرقام وأشكال، وحاول لا تستخدم كلمة سر واحدة لكل المواقع اللي بتدخل عليها.
- لا تعطي أي شخص بيانات الدفع الخاصة بك أو أسم المستخدم وكلمة السر لأي موقع شراء بتدخل عليه.
- وانت بتعمل عملية الشراء لازم تتأكد من اتصالك بالأنترنت يكون متأمن، وحاول لا تقوم بعمليات الشراء أثناء الدخول على الأنترنت من الكافية أو القهوة أو أي مكان مش متأمن الاتصال بتاعه بشكل جيد وقوي.
- الجهاز اللي هاتقوم من خلاله بعملية الدفع لازم يكون مثبت عليه جدار ناري Fire Wall و مكافح فيروسات Antivirus ويكون معمول لهم تحديث على أعلى اصدار للتأكد من عدم تجسس أي شخص عليك.
- لو هاتشتري من خلال المحمول لازم تتأكد أن التطبيق اللي بتشتري من خلاله هو التطبيق الأصلي للموقع اللي بتتعامل معاه، ولازم تتأكد من تثبيت مكافح فيروسات لو بتستعمل هاتف بيعمل بنظام تشغيل Android
ثانياً: تأمين نفسكم في الشراء التقليدي
علشان نوصل لتأمين جيد لنفسنا في الشراء التقليدي، لازم نقسم عملية الشراء نفسها لثلاث أقسام مختلفة، ونعرف ها نأمن نفسنا ازاي في كل قسم منها، وهانتعامل ازاي وامتى نشعر أننا فعلا معرضين للخطر.
أولا: قبل عملية الشراء
- تأكد من المواصفات الفنية لأي شيء بتشتريه من الموقع الرسمي الخاص به – خصوصا أجهزة الموبايل والتابلت واللابتوب- علشان تجنب على نفسك شراء السلع المزيفة أو الغير أصلية أو المقلدة.
- لو تقدر ماديا تشتري سلعة جديدة بدلا من شرائها مستعملة لا تتردد أبدا علشان تبعد عن مشاكل شراء السلع المستعملة
- لازم تعرف أكتر من شخص أنك هاتقابل بائع محتمل، ولازم تكون معرف الناس العنوان اللي هاتتقابلوا فيه والميعاد، وطبعا لازم تسيب بيانات الشخص اللي هاتشتري منه مع أكتر من شخص في نفس الوقت.
- لا تشتري أي سلعة عليها تخفيض في سعرها أكثر من 50% لأنها يا هاتكون مغشوشة أو هاتكون حيلة لاستدراجك للقاء يمكن يحصل فيه أي مكروه لك. ولازم التخفيضات تكون مقترنة بمناسبات معينة أو ظروف خاصة، ولازم التخفيض يكون بحدود معينة مفهومة ومنطقية.
- اهتم بمعرفة اكبر قدر من المعلومات عن الشخص اللي هاتشتري منه قبل الشراء، ويستحسن تتعامل مع اشخاص بتتعامل بصورتها الحقيقية وأسمها الحقيقي مش صور مزيفة أو أسماء غير حقيقية أو وهمية.
ثانيا: أثناء عملية الشراء
- من المستحسن تصطحب معاك أكثر من شخص اثناء مقابلة البائع.
- لازم تختار مكان عام ومتواجد فيه ناس كتير، كمان من المستحب يكون المكان قريب من نقطة شرطة أو أي تجمع أمني. ولازم يكون مكان فيه تغطية جيدة لشبكات المحمول.
- لا تستجيب لأي طلبات غريبة أو غير منطقية من البائع زي أنك توافق تروح معاه المنزل بحجة تجربة السلعة، أو أنك تركب معاه العربية وتروحوا لأي مكان غير المكان المتفق عليه.
- اختيار ميعاد المقابلة لازم يكون في وقت طبيعي بعيدا عن الأوقات الغريبة سواء كانت في أول اليوم أو متأخر جدا.
- حاول تخلي كلامك مع البائع في حدود الكلام عن السلعة والسعر، وتجنب العشم الدائم أو ادعاء الصداقة مع البائع، وافتكر انك في الأول والنهاية بتخلص صفقة تجارية مش بتكون صداقات جديدة!
- تجنب أي عزومة من البائع على أي مأكولات أو مشروبات بيطلعها من معاه، حتى لو حاول احراجك.
ثالثا: بعد عملية الشراء
- قارن المنتج اللي اشتريته بمثيله على الموقع الرسمي الخاص بالمنتج، وبمواصفات المستخدمين الموثوق فيهم على مواقع التواصل الاجتماعي علشان تتأكد أن معاك المنتج الصحيح.
- لو بتشتري هاتف ذكي تأكد من الرقم المتسلسل Serial Number الخاص به علشان تتأكد أنه أصلي مش مزيف أو مزور.
- تجنب الدخول في احتكاكات أو خناقات مع البائع لو السلعة مش عاجباك أو حصل خلاف بينكم.
- حاول تحتفظ بأي وسيلة تدل على عملية الشراء (إيصال – مخالصة) وفي أبسط الحالات احتفظ بتسجيل المحادثات بينك وبين البائع لأثبات عملية الشراء في حالة تورطك في شراء سلعة مسروقة.
الخلاصة
وفي نهاية موضوعنا بنحب دايما نقدم لكم المختصر المفيد من وراء الموضوع:
|
أزاي تحمي نفسك في الشراء أونلاين |
ازاي تحمي نفسك في الشراء التقليدي |
|
|

