مقالات موقع Yaoota

مميزات وعيوب وسعر وتقييم لعبة Call of Duty: WWII

قراءة سهلة

في خريف سنة ٢٠٠٣ … استقبل محبي الألعاب حوالين العالم، وفي السايبرات ومحلات الألعاب، و الحطابين فى الجبال النائية والفلاحون فى مزارعهم والعجائز حول نار المدفأة النسخة الأولى من سلسلة ألعاب Call of Duty. السلسلة، اللي ممكن نقول أنها – بدون مبالغة- غيرت الطريقة اللي بيمارس بيها العالم كله الألعاب الالكترونية!

ماتنسوش إنكم لو قررتوا تشتروا Call of Duty: WWII هتقدروا تطلبوه من خلالنا في ياقوطة وهيوصلكم لحد باب البيت وكمان تقدروا تشتروا Call of Duty: WWII دي بالتقسيط من خلال شهري أول وأسهل تطبيق للتقسيط في مصر واللي مش بيحتاج منك غير صورة البطاقة وصورة إيصال مرافق وبس، ومن غير زيارة ولا ضامن واستمتع كمان بتوصيل مجاني لكل مشترياتك من خلاله.

*أسعار المنتجات في المقال هي الأسعار المدرجة في المتاجر وقت نشر المقال، الأسعار متغيرة صعودًا وهبوطًا وفقًا لحركة الأسواق.

https://yaoota.com/ar-eg/product/activision-call-of-duty-wwii-ps4-price-from-jumia-egypt

لعبة Call of Duty كان ممكن تكون لعبة اطلاق نار تقليدية، لكن ستوديو Activision اللي أطلق اللعبة، أصر على أنه يخليها استثنائية، وده من خلال عمل دقة رسوميات عالية جدا، ونظام ذكاء يخلي الأعداء يغيروا اسلوبهم في الهجوم اعتمادا على طريقة هجوم اللاعب عليهم، والتنويع في المهام ما بين مطاردات سيارات واقتحام منازل وزرع عبوات ناسفة، وأهم نقطة هي: أن صناع اللعبة استوحوا الأحداث من فترة الحرب العالمية الثانية، بكل الزخم اللي تحمله في نفوس المهتمين بيها، واللي لسه شايفين فيلم Saving private Ryan سنة ١٩٩٨ واللي استوحت اللعبة كتير من تفاصيلها منه.

من يومها، وبداية من ٢٠٠٥ وحتى ٢٠٢٢، بيتم اصدار نسخة جديدة من Call of Duty.. كلهم تقريبا بيحققوا نجاح ساحق، لكن مع الوقت والنجاح، قررت Activision أنها تبعد عن الحرب العالمية الثانية، وبدأت تقدم نسخ قائمة على المستقبل، وحروب الفضاء والسفر عبر الزمن. ومع الوقت بدأ اللاعبين يشتكوا من أنهم عاوزين مضمار الحرب القديم بتاعهم، والأسلحة التقليدية، والدبابات العتيقة، والمدافع الثقيلة، بكل ما تحمله لهم من نوستالجيا جميلة بتفكرهم بليالي الصيف اللي قضوها في لعب النسخ الأولى من اللعبة.

أخيرا وفي نسخة Call of Duty: WWII بتقرر Activision تصالح اللاعبين، وترجع تاني للحرب العالمية الثانية، خاصة أن غريمها التقليدي المتمثل في لعبة Battlefield كان عامل عظمة في تقديم ألعاب تنتمي لفترة الحروب القديمة. قدمت Activision بالإضافة للقصة طور (زومبي) وقسم العاب عبر الشبكة، بيخلي اللاعبين تلعب ضد بعضها، إما على الشبكة الداخلية Lan network أو عبر الانترنت.. ببساطة: كان أمامنا نسخة متطورة حديثة برسوميات عالية، وذكاء اصطناعي خطير، للنسخة الأولى المحبوبة من اللعبة اللي اتعودنا عليها.

طور القصة Campaign

قصة Call of Duty: WWII بتحكي عن المسرح الأوروبي لأحداث الحرب العالمية الثانية، وهي الزاوية المفضلة للتناول الأمريكي للحرب العالمية الثانية، لأن الأحداث الساخنة في الحقبة دي بتبدأ مع دخول أمريكا ساحة الحرب، أحداث اللعبة بتدور بداية من عملية عسكرية ضخمة للحلفاء حملت اسم “اوفرلورد”. من خلال قصة الجندي (ريد) اللي بينضم لكتيبة مقاتلة، وبيبدأ ينفذ عمليات قتالية صعبة ودموية.

المميز في الجزء ده من القصة في Call of Duty: WWII أننا بنشوف انفعالات ومشاعر إنسانية عادية، بمعنى أن الأشرار مش أشرار على طول الخط، والأخيار مش أخيار على طول الخط. وطول الوقت كل شخصية كان عندها الوقت تحكي دوافعها ويكون لها تأسيس جيد من الماضي يبرر لها التصرف الحالي اللي بتعمله. وحتى لما بنشوف بطلنا (ريد) بيتعرض للاضطهاد والمعاملة السيئة من القائد بتاعه، بنفهم أن القائد عنده مشكلة نفسية نتيجة أنه تسبب في موت جنود تابعين له قبل كده.

في Call of Duty: WWII كان فيه اهتمام كبير بتطوير طور القصة، بمعنى أن اللعبة مش كلها اطلاق نار من منظور الشخص الواحد، لكن كمان بنتحكم في أشخاص مختلفين في اللعبة، وأحيانا في دبابات وطائرات. كل فصل من الفصول كان له متعته الخاصة المختلفة عن الفصل اللي قبله. وفي واحد من الفصول بنتحكم في بنت جريئة بتشتغل لحساب المقاومة الفرنسية في باريس، علشان تسرق أوراق مهمة من مقر تابع للنازي، مُهمة مش محتاجه مواجهة وقتال بقدر ما محتاجه ذكاء وقدرة على التسلل، وفي بعض المهام بيكون لازم نستعمل ذكائنا مش بس قدرتنا على التصويب، علشان نخرج من مواقف صعبة. أما الفصل الأخير في طور القصة، بنشوف فيه استعراض مؤلم لجرائم النازي في الحرب العالمية الثانية، وجولة في معسكرات الاعتقال اللي شهدت فظائع لا تغتفر.

العيب هنا، أن القصة أقصر من توقعاتنا نسبيا، وكنا محتاجين فصول أكتر علشان نحس بمتعه أكتر. كمان بعض الفصول كان فيها أجزاء للقصة بتاخد وقت طويل نسبيا قبل ما تبدأ المعركة، بالتالي لما جربنا نعيد اللعب تاني كنا زهقانين من إعادة المشاهد التمثيلية تاني، خاصة أن مافيش اختيار Skip للناس اللي عاوزه تقفز للمعركة علطول.

اللعب عبر الشبكة Multiplayer Mode

مافيش شك أن طور اللعب عبر الشبكة في Call of Duty: WWII كان أكتر من ممتع. خاصة أنه تم تحويل القوائم الطويلة المتداخلة مع بعضها، لمنطقة مشوقة بصريا، بيتجول فيها اللاعب بنفسه ويختار من الحاجات اللي بتظهر قدامه بدل الدخول في القوائم اللي كانت بتبقى غير مفهومة أحيانا.

تطوير تاني تمت اضافته وهو تقسيم إمكانيات اللاعبين حسب التخصص أو السلاح التابعين له. يعني مثلا سلاح المشاه بيعطي اللاعب تفوق فيما يتعلق بسرعة الجري، والقدرة على زراعة الألغام. بينما سلاح العمليات الخاصة، بيعطي اللاعب قدرات أفضل في استخدام الأسلحة البيضاء، وقدرات على التخفي من الرادار أثناء اللعب.

الميزة هنا هي زيادة متعة اللعب بلا شك، لكن في المقابل كان فيه عيب، هو صعوبة فهم اللعبة والدخول للمعارك (بسهولة) خصوصا على اللاعبين اللي بيجربوا عالم Call Of Duty للمرة الأولى. وأحيانا لقينا نفسنا بنذاكر وبنقرأ عن الأسلحة والتخصصات المختلفة، لمدة طويلة قبل الدخول في أي معركة، علشان نحصل على نتائج مرضية في النهاية.

أضافت Activision طور جديد للعب على الانترنت هو الوضع War. وهو وضع فيه عدد لاعبين أكبر، وفيه مهام مختلفة مستوحاه من معارك حقيقية في الحرب العالمية الثانية، مع خرائط أكبر، ونعتقد أن الوضع ده كان بداية استكشاف وتطوير أوضاع الـ Arena اللي أصبحت أساسية النهرده مع الاعجاب الأسطوري من اللاعبين بألعاب PUBG و Fortnite وغيرها.

أكبر مشاكلنا مع طور الشبكة في Call of Duty: WWII كان بعد نهاية “شهر العسل” مع اللعبة، لما سيرفراتها أصبحت أتقل من المعتاد، وبنحتاج نستنى وقت طويل نسبيا علشان ندخل معركة جديدة لقلة عدد اللاعبين المتصلين. بالإضافة لفصل اللعبة أثناء اللعب بسبب احتياجها انترنت أفضل، ومشاكل كتير خلت تجربتنا في اللعب أونلاين مش أفضل حاجه.

طور الزومبي Nazi Zombies

ولأن كل حاجه في Call of Duty: WWII لها علاقة بالحرب العالمية الثانية، كان طور الزومبي في اللعبة، معتمد على قصة خيالية، عن رغبة النازية قلب نتيجة الحرب في الأيام الأخيرة، من خلال تكوين جيش من الزومبي، وبيكون على البطل أنه يواجه الزومبي لحد أخر طلقة. ولحد أخر نفس.

طور الزومبي هنا يعتبر أكتر من رائع، وممكن تقضي قدامه ساعات من اللعب بدون زهق. لكن لما تحقق انتصارات لفترة طويلة، هايصعب عليك التقدم اللي حققته وفكرة انك لازم تعيده من الأول. علشان كده بننصحك تخلي الزومبي يلفوا حواليك في دوائر طويلة. ومن خلال المسار الطويل ده تبدأ تصطادهم بمنتهى الحذر، علشان رصاصك ما يخلصش قبل فوات الأوان. ودي من النصايح اللي تعلمناها بعد فترة طويلة مع اللعبة.

نصائح وارشادات

  • تابع تحديثات اللعبة باستمرار، واقرا عن تفاصيل كل تحديث بعد ما تعمله علشان تعرف ايه اللي تغير، وازاي تقدر تستفيد بالمتغيرات دي علشان تجربة لعب أفضل.
  • لازم تقرأ أكثر عن تخصصات الأسلحة المختلفة، لازم تعمل Upgrade لأسلحتك باستمرار. وتتابع المهام اللي بتديك نقاط إضافية علشان كل ما تطور شخصيتك أكتر كل ما تقدر تهزم الأعداء اسهل في طور الانترنت.
  • حاول بكل الطرق توفر اتصال انترنت سريع لبلاي ستيشن علشان تستمتع بطور اللعب عبر الانترنت. ممكن توصل بلاي ستيشن مباشرة بالراوتر باستخدام سلك، مش باستخدام wifi connection علشان تاخد اتصال مستقر أكتر. وهتلاقي Call of Duty: WWII بتعرض لك نصائح أكتر علشان تستمتع باللعبة.
  • جرب تشتري تطويرات اللعبة، علشان تلعب في خرائط جديدة منها خريطة بتدور فيها الأحداث في مصر في فترة حرب العلمين. كمان هاتحصل على خريطة زومبي جديدة.

شوف Call of Duty: WWII من هنا

*قد تنفد بعض المنتجات من المتاجر في أي وقت لكن غالبًا ما تصبح متاحة بعد فترة وجيزة، إذا صادفتك مشكلة مع أي منتج من فضلك قم بإبلاغنا في تعليق أو من خلال صفحة Yaoota.com على فيسبوك.

زر الذهاب إلى الأعلى