مقالات موقع Yaoota

ازاي تفرق بين التليفون الأصلي والتقليد

قراءة سهلة

مع انتشار عدد كبير من الهواتف الذكية والموديلات المختلفة، والتفاوت الكبير في الأسعار والأمكانيات بين الموديلات، انتشرت ظاهرة سيئة بين عدد كبير من البياعين وهي ظاهرة الهواتف الذكية المقلدة أو المزورة واللي بتتباع على أنها أصلية، مع أغراء المشترين بتخفيض سعرها بشكل كبير علشان الناس تقبل عليها.

الظاهرة دي انتشرت في كتير من دول العالم، وفي المنطقة العربية ومصر، ووصلت لنا كتير من الأسئلة عاوزه تعرف طرق عملية وسهلة للتفرقة بين التليفون الأصلي والمقلد، علشان ما فيش ناس كتير تروح ضحية عمليات النصب والاحتيال اللي بتحصل.

في موضوعنا هانتعرف على بعض التجارب اللي وقع أصحابها فعلا ضحية لنصابين، وهانتعلم ازاي نفرق بين الهاتف الأصلي والتقليد سواء قبل فتح الهاتف أو بعد فتح العلبة الخاصة به.

تجارب مع تليفونات مقلده.

في البداية بتحكي لنا رنا، ازاي تعرضت لمحاولة للنصب عليها من محل شهير في أحد الدول العربية، واللي كانت ها تشتري منها تليفون أيفون 6 حديث، لكنها اكتشفت قبل إتمام عملية البيع بوقت قليل اختلاف شكل العلبة الخارجية عن شكل العلبة الأصلية على الموقع الرسمي لشركة أبل. الأمر اللي خلاها تشك وتتوقف عن الشراء وتنقذ نفسها من شراء تليفون مقلد.

لكن على العكس من حظ رنا الجيد، محمد حسن كان حظه أسوأ لما اشترى تليفون سامسونج من محل في أحد المولات المشهورة بالتجارة في التليفونات الذكية، ثم اكتشف بعد حدوث عطل في التليفون وذهابه للضمان أن التليفون مش أصلي والضمان مش معترف به، وللأسف فشل محمد في ارجاع التليفون بسبب مماطلة ومجادلة العاملين في المكان.

سارة الجمل كانت واحدة من اللي حظهم جيد لأنها قدرت ترجع تليفونها بصعوبة بعد اكتشافها أنه مزور، بعد وقت قليل من شراء التليفون من خلال مقارنة مواصفات التليفون بالمواصفات الرسمية المنشورة على موقع التليفون (ماركة هواوي)، لكن سارة قدرت تستعيد الفلوس اللي دفعتها في التليفون بعد مشادات ومجادلات.

تجربة تانية مع أيفون بيحكيها لنا عبد المجيد راشد، واللي أغراه اعلان عن أيفون 8 بتخفيض كبير في السعر على الرغم من أن الأيفون 8 لسه نازل جديد نسبيا في الأسواق، لكن مع فحص التليفون بدقة أكتشف أن ظهر التليفون من البلاستيك مش من الزجاج على العكس من الأصدار الأصلي ورفض في النهاية شراء التليفون.

والمواقف دي مش بتحصل في المنطقة العربية فقط، لكن في كتير من الدول والعواصم العالمية كمان، وكلنا فاكرين واقعة شهيرة حصلت في أمريكا لما اشترت سيدة تليفون أيفون ذكي مقابل 100 دولار فقط في تخفيضات الجمعة السوداء Black Friday ثم اكتشفت في النهاية أن البائع أعطاها قطع بطاطس داخل علبة أيفون حقيقية!

قبل فتح التليفون.. ازاي تفرق بين الأصلي والتقليد؟

كتير من الناس بتكون مهتمة بمعرفة طريقة التفرقة بين التليفون الأصلي والتقليد قبل فتح التليفون، ولو حظكم كويس الشخص أو الشركة المُزيفة هايفوتها بعض التفاصيل اللي لازم تركزوا فيها كويس جدا علشان ما تسقطوش في فخ النسخ المزيفة من الهواتف الذكية.

اعرف شكل التليفون كويس

من الأمور المهمة اللي لازم تاخد بالك منها كويس هي مواصفات التليفون الخارجية، زي شكل العلبة من الخارج أو الطباعة الموجودة عليها ولون العلبة وأبعادها، علشان أي تغير في المواصفات دي حتى لو كان طفيف بيكون واحدة من أهم العلامات اللي ممكن تعرف من خلالها أن التليفون مزيف أم لا. علشان كده بننصح بالدخول على الأنترنت ومراجعة التليفون من الموقع الرسمي الخاص به والتأكد من أنه بالفعل شكل العلبة وأبعادها والكتابة عليها هي نفس المواصفات اللي هاتشوفها بعينك على علبة التليفون.

كمان من العلامات اللي ممكن من خلالها تعرف الفوارق بين التليفونات المزيفة والحقيقية هي الطباعة أو اللوجو اللي بيكون على علبة التليفون واللي بيكون مكتوب بشكل مطفي أو كجزء من العلبة. في معظم التليفونات المزيفة الطباعة دي بتكون بارزة أو لامعة بشكل مختلف عن العلبة، ودي علامة جيدة ممكن تكتشف من خلالها الفرق بين الأصلي والمزيف، لكنها للأسف مش بتنطبق على كل أنواع التليفونات.

اعرف مواصفات التليفون

من المهم أنك تعرف مواصفات التليفون كويس.. زي الأبعاد والوزن والبطارية وسعتها ونظام التشغيل و..الخ وكل التفاصيل دي لو مكتوبة على العلبة لازم تراجعها كويس وتتأكد أنها مطابقة للمواصفات الأصلية الموجودة على موقع الشركة المنتجة للهاتف الذكي.

ومن خلال مقارنة المواصفات المكتوبة على الموقع الرسمي بالمكتوبة على علبة الموبايل تقدر تميز بسهولة أي تغيير أو تلاعب في مواصفات التليفون.

التلاعب في أسماء الماركات

بعض الشركات بتتلاعب في أسماء الماركات الشهيرة علشان تعطي انطباع للمستخدمين أنها أصلية، يعني على سبيل المثال بدل ما تكتب Samsung على العلبة الخاصة بالتليفون بيتكتب Samsong مثلا، أو أي تحريف تاني للأسم، وبكده بتكون الماركة اتغيرت وكتير من المستخدمين مش بيعرفوا الفرق أو مش بيلاحظوا الاختلاف في الإسم، وبيترتب عليه شرائهم لتليفون رخيص وغير أصلي بسعر التليفون الأصلي.

بعد فتح علبة التليفون.. ازاي تميز بين الأصلي والمزيف؟

أما بعد شراء التليفون ولو شكيت اذا كان التليفون مزيف أم لا، بعض العلامات ممكن تخليك تعرف الفرق بين التليفون الأصلي والمزيف، وعلى الرغم من الحيل والخدع اللي بتتطور يوم بعد يوم في عالم تزوير الهواتف الذكية أو بيع أنواع صينية مش معروفة على أنها ماركات عالمية، لكن بعض التفاصيل الصغيرة ممكن تفرق. وتوضح لنا الفرق بين التليفون المزيف والأصلي.

الرقم المتسلسل Serial number

كل تليفون أصلي بيكون معاه رقم متسلسل أو Serial Number بيميز كل قطعة من قطع الهواتف اللي بيتم بيعها عن بعضها البعض حتى مع تشابه الموديلات أو المواصفات الداخلية، لكن التليفونات الغير أصلية مش بيكون لها رقم متسلسل أو بيكون معاها رقم متسلسل مضروب، علشان كده ممكن نتصل برقم *#06# علشان نعرف الرقم المتسلسل للتليفون ونتأكد أنه بالفعل رقم صحيح. وفي الغالب لو التليفون مزيف هايكون فيه اختلاف بين الرقم المتسلسل الظاهر على شاشة التليفون وبين الرقم المكتوب على العلبة أو البطارية أو على التليفون نفسه.

التصميم الخارجي للهاتف

من الأمور المهمة أنك تشوف فيديوهات وصور واضحة للتليفون من جميع الجوانب من خلال الموقع الرسمي للشركة المنتجة للتليفون الذكي، أو من قناتهم الرسمية على يوتيوب، ومقارنتها بالتليفون اللي تم شراءه، ولو كان التليفون مزور بيكون فيه اختلاف واضح في حجم وأماكن الأزرار ومستشعرات البصمة – لو كانت موجودة – وغيرها من الأمور اللي بتشكل التصميم الخارجي للتليفون. ومن هنا ممكن نعرف الفرق بين التليفون المزيف والأصلي.

كمان لازم ناخد بالنا من كفاءة الشاشة وقدرتها على عرض الألوان، ومواد صناعة التليفون، وجودة الصورة اللي بيتم التقاطها بالكاميرا، كل الحاجات دي ممكن تعرفنا الفرق بين التليفون المزيف والأصلي، لأن التليفون المزيف بتكون كفاءة الشاشة والكاميرا قليلة، وعرض الشاشة للألوان بيكون أقل وأسوأ بكتير من التليفون الأصلي، خاصة التليفونات الذكية المشهورة وصاحبة الإمكانيات العالية والمميزة.

أخر نقطة هانقولها في الجزء ده هي ضرورة التأكد من نظام التشغيل الخاص بالتليفون. ومعظم التليفونات المزيفة بتيجي مع نظام تشغيل غير أصلي أو ملعوب فيه أو غير نظام التشغيل المكتوب في مواصفات التليفون الموجودة على الموقع الرسمي للتليفون. كمان لو كان التليفون مش بيقبل التحديث لأحدث نظام تشغيل – حسب مواصفات التليفون – دي بتكون علامة مهمة على أنه مزيف، وطبعا لو نظام التشغيل مختلف تماما، زي أنك تشتري أيفون وتكتشف أنه شغال بنظام اندرويد ده دليل على أن التليفون مزيف بنسبة 100%!

الوقاية خير من العلاج

وعلشان دايما تجنب النصب بيكون أفضل من تعلم كيفية التغلب على أثاره الجانبية، بيستحسن من البداية أننا نقوم ببعض الخطوات المبدئية اللي تخلينا واثقين بشكل أكبر من أننا بنشتري التليفون الأصلي. علشان كده ها نختصر لكم بعض النصائح الهامة اللي تضمن أنك بتشتري التليفون الأصلي من البداية.

  • حاول تشتري التليفون من مراكز البيع المعتمدة والمكتوبة في الموقع الرسمي لشركة التليفون الذكي. لضمان أنك بتشتري التليفون الأصلي من البداية.
  • بعض عروض التخفيضات الكبيرة في الأسعار بيكون ورائها بيع هواتف غير أصلية أو مزيفة، خصوصا لو عروض غير منطقية زي خصم أكتر من 50% مثلا. بلاش تنخدعوا بالرغبة في التوفير وحاولوا تختاروا العروض المنطقية.
  • بعض الأماكن بتستغل فترات العروض والتنزيلات علشان تقدم تخفيضات كبيرة تجذب المشترين لها، لكن في المقابل بتكون التليفونات غير أصلية أو مزيفة، بالتالي لازم لا نندفع وراء التخفيضات الكبيرة قبل ما نفهم سبب التخفيضات وأنها تكون منطقية ومن جهات موثوقة.
  • بعض المحلات في بعض المناطق أو المولات المتخصصة في بيع التليفونات الذكية بتحترف تزوير وبيع الهواتف المزيفة، علشان كده ممكن تسألوا عن سمعة المحل قبل الشراء من خلال الأنترنت. وممكن تستعملوا جروب ياقوطة على موقع فيس بوك علشان تسألوا عن أي شيء تحبوا تعرفوا عنه.
  • بعض الأماكن لها سمعة غير طيبة في مجال التليفونات المزيفة أو العروض الوهمية بشكل عام، زي بعض المحلات مجهولة الأسم في وسط البلد أو بعض المولات المتخصصة في المنتجات التكنولوجية بشكل عام والتليفونات الذكية بشكل خاص.
  • واحنا بنشتري لازم نركز في أسم الماركة والموديل وشكل العلبة الخارجية وباقي التفاصيل الخاصة بالتليفون ولازم نشوف أكتر من فيديو عن التليفون وخصائصه ومواصفاته والعلبة وباقي التفاصيل، ولازم تكون من الموقع الرسمي للموبايل.
  • لو هاتشتري تليفون ذكي مستعمل لازم تركز كويس جدا أثناء الشراء وتعاين التليفون كويس قبل دفع الفلوس، وممكن تروح لمركز معتمد علشان يكشف على التليفون كويس من الخبراء قبل إتمام عملية الشراء لأن بواقع الحال عمليات الاحتيال في مبيعات التليفونات المستعملة بتكون أكتر من التليفونات الجديدة.
  • لو بتشتري أونلاين حاول تشتري من المواقع والمتاجر المعروفة والمشهورة، وبلاش تنجرف وراء التخفيضات اللي بتعلن عنها مواقع غير موثوقة أو تجار مش معروفين. وممكن تستعين بمحرك بحث ياقوطة علشان تقارن الأسعار من متاجر مؤكدة وموثوقة.

الخلاصة

وفي النهاية بنختصر لكم كل المعلومات اللي في موضوعنا علشان نقدم لكم الخلاصة

قبل قرار الشراء

قبل فتح العلبة

بعد فتح العلبة

  • يستحسن تشتري من متجر رسمي حسب ماركة الموبايل.
  • بلاش تنجرف وراء التخفيضات الكبيرة.
  • احذر من شراء المستعمل.
  • أسأل عن سمعة المكان اللي هاتشتري منه.
  • اشتري أونلاين من مواقع موثوقة.
  • اقرأ مواصفات التليفون وشكل العلبة كويس جدا قبل الشراء.
  • تأكد من مطابقة شكل علبة التليفون للشكل على الموقع الرسمي للتليفون.
  • ركز في أسم الموديل وأنه مكتوب صح وشكل الكتابة على العلبة مطابقة لأسم الماركة.
  • قارن جودة الأكسسوارات والشواحن والسماعات مع جودة القطع الأصلية
  • تأكد من مطابقة المواصفات المكتوبة مع المعلن عنها في موقع التليفون.
  • تأكد من صحة الرقم المتسلسل للتليفون ومطابقته للمكتوب على العلبة.
  • قارن جودة الكاميرا والشاشة بجودة المنتجات الأصلية.
  • راقب أي تغير في شكل الزراير وأماكنها على التليفون.
  • قارن نظام التشغيل على التليفون بالمكتوب على العلبة والمعلن من شركة المحمول.
زر الذهاب إلى الأعلى